Papieròt del dijòus (del 5/01/23)

Brave monde, vaquí lo primièr Papieròt del dijòus de l’an. Un Papieròt qu’a perdut son adjectiu geografic de menerbés aprèp l’arrèst de publicacion de l’ebdomadari La Semaine du Minervoisa la fin de decembre. Esperam que trapen una solucion per se relançar. Doncas, en aquesta debuta de 2023, lo Papieròt passa en version radiofonica e setmanièra sus Ràdio-Lenga d’Òc-Aude e Ràdio-Lenga d’Òc-Erau e pareisserà tanben dins lo Jornalet per parlar coma de costuma de tot e, tanben, de res.

Aprèp, vos aver desirada la bona annada, plan granada e tot e tot, pensi que m’acontentarai d’aquel messatge parlat e que me vau pas lançar dins un mandadís de cartas de vòts.

Comprenètz que me cal daissar lo temps de decorticar lo foncionament novèl de distribucion del corrièr imaginat per la Pòsta segon una logica implacabla : d’ont mai va, i a mens de corrièr e per que n’i agèsse encara mens, faguèm en sòrta qu’arribèsse de mai en mai tard.

Dins lo temps, a Carcassona, i aviá una boita de letra a la gara que s’i escampavas ta letra, partissiá per un trin seguent ont postièrs preparavan son acaminament a la destinacion finala. I a pas mai de boita de letras a la gara de Carcassona.

Dins lo temps, tanben, s’escriviás las adreiças en occitan, lo corrièr arribava que los postièrs de la tria trapavan lo monde que coneissián. Quand aquel trabalh foguèt fait per las maquinas, las adreiças occitanas passèron pas mai que las maquinas coneisson pas lo monde.

La Pòsta darnièrament publicava paginas entièras de publicitat per demandar de pagar un seguit en mai del sagèl per saupre ont n’èra vòstra letra e s’èra arribada a destinacion. Per faire clar, te caliá pagar un suplement per èsser segur que la Pòsta fasiá lo trabalh qu’èra lo seun. 50 centimes de mai pel contraròle ! Es que van metre en plaça un servici de pèrda del corrièr per justificar lo recors a n’aquel sistèma ?

Per entamenar 2023, passam a l’estadi superior : la supression del sagèl roge, dit corrièr rapide ! Dins un monde que va de mai en mai vite, vaquí una causida de la lentor ! I aurà pas mai de letra distribuida l’endeman de son mandadís. Se volètz faire aquò, vos la caldrà faire informaticament e es lo burèu de Pòsta d’arribada que farà lo tiratge per l’anar balhar a vòstre correspondent. Bonjorn la confidencialitat. De fait, val mai mandar un corrièl. E se pèrd lo plaser d’escriure a la man, de dessenhar un pichon còr s’es per ton amorosa o ton amorós, de daissar liure cors a ton inspiracion calligrafica o a ton escritura de gat o de mètge !

La letra verda èra ja dita de tarifa lenta : la lentor se va renfortir que vos explican qu’ara caldrà esperar tres jorns per que lo corrièr arribèsse a son destinatari en plaça de dos. Mas auretz mème a disposicion un sagèl turquesa que vos garantirà l’arribada del corrièr dins los 2 jorns s’es un mandadís important que necessitariá una traçabilitat, coma lo mandadís de chèc. En resumit, lo sagèl roge desaparegut, lo verd a 1,16 e lo turquesa a 2,95 € e 1,49 per la letra informatica

Pareis que la Dòna de Sévigné ven d’anonciar qu’arrestava d’escriure Letras ; d’autres, se lançan dins l’elevatge de palombs messatgièrs… Pels corrièrs manuals e pels sagèls, es vengut lo temps de la desuetud ; los pauròts passan d’usatge : passan pas mai coma… una letra a la Pòsta…

Sagelat Roch