Papieròt del dijòus (del 09/02/23)

Atal, lo cònsol de Rodés a decidit de portar un còp fatal a la manifestacion bèla occitana organizada dins sa vila : l’Estivada. Es pas vertadièrament una suspresa que, dempuèi quauque temps, semblava plan que la Comuna sosteniá lo rendètz-vos coma la còrda sosten lo penjat.

 

Atal, en 2022, las informacions sul debanament del festenal foguèron plan tardièras.Una setmana abans la debuta, i aviá pas de programa suls sites de la Comuna o de l’Ofici de Torisme. D’unes se pausavan ja la question de saupre se se fariá o pas…

En aqueles temps, ont se parla fòrça de relocalizacion e de circuits corts, de l’importància dels territòris, es clar qu’es un camin totalament diferent qu’es causit. Rodés teniá d’aur entre las mans per faire una granda manifestacion occitana e dobèrta sul monde. Èra lo camin pres las primièras annadas quand las collectivitats regionalas occitanas sostenián las programacions per faire de Rodés un luòc de rescontre e d’escambis, un punt fòrt de l’annada amb las seguidas possiblas long dels meses.

Un festenal vertadièr es pas solament una programacion de caps d’aficha, mas un luòc de rescontres, de formacion, de discutidas (e las Estivadas passadas ne coneguèron unas bèlas),… D’una part, lo grand platèu (e per la frequentacion, me sembla plan que sovent lo ferial èra negre de monde), mas tanben las pichonas salas, los pichons formats, unes taulièrs, de libres, d’expressions plasticas, d’estagis, de rescontres informals,… 

N’i a pro de nos demandar d’èsser dobèrts sul monde (çò que sèm) e de ba probar en convidant totes los genres de musicas e d’expressions dins nòstras manifestacions, mas que per contra siague totjorn la pòrta sul nas (levat plan raras excepcions) per que los artistas occitans siaguen convidats endacòm mai. Dobèrts als autres e tampats pels autres, seriá nòstre sòrt ?

De segur, una popularitat mai fòrta de la manifestacion es de ganhar amb cap de preséncia dins las play-list de las ràdios, unas aparicions infinitesimalas al finestron. France-Télevision a rajustat del temps del Covid una cadena culturala Culture-Box (bonjorn, la defensa de la francofonia) : agètz pas paur, avètz pro de dets a una man per que s’ i siague vist un artista occitan en 3 annadas ! E es sus aquel monde que lo consòl de Rodés compta per valorizar una manifestacion que serà semblanta a plan d’autras programacions estivencas. Un festenal es pas solament una frequentacion, mas es tanben un contengut e la carta bèla de l’occitan e d’una dobertura sus d’autres fòrabandits dels circuits show-bizz se podiá, se deuriá e es possibla de jogar e de valorizar. Un festenal es pas solament una programacion, mas tanben un ambient e una integracion dins la vida vidanta del luòc.

Ara, la question es pausada als occitanistas : associatius e artistas. Quna perspectiva per gardar o bastir un eveniment federator e mobilizator ? Ara, la question es pausada a las instàncias regionalas : cossí aver d’un costat un plan subrebèl per una cultura viva, una lenga viva e pas trapar de relais de las autras collectivitats per tirar dins lo meteis sens ?

A Carcassona, dins lo temps, i agèt un festenal de teatre amb unas tropas que trabalhavan long de l’an dins la contrada. A la debuta de las annadas 80, agèrem doas annadas sus una tematica bèla : Carcassona reçaup Mediterranèa. Dins totes los luòcs de la vila, se vegèron espectacles en francés, en occitan, en catalan, en italian, en castelhan, en palestinian, … La Comuna de l’epòca seguiguèt pas dins aquesta dralha. Ara, i a totjorn un quicòm que se ditz festenal que sembla la tièra de tot çò que se pòt veire de pertot e que se seguisson d’un jorn l’autre sens ambient festivalièr. E vos parli pas del teatre bèl ont se jòga pas mai de teatre… A Carcassona, amb sa Ciutat, cap de manifestacion bèla dins l’an a l’entorn de l’istòria, dels trobadors, …

Carcassona e Rodés, exemples de l’incapacitat d’unes elegits e responsables aculturats de se sasir de las riquesas patrimonialas, istoricas, culturalas, toristicas qu’an jos la man per jogar una carta dinamica, enrasigada, prenent en compte originalitat, diversitat, diferéncias e dobertura en plaça de s’acontentar de reprene çò que se fa e se trapa de pertot.

Pensatz de signar e de faire signar la peticion Gardarem l’Estivada.

IvernatRoch

man in bunny costume in mid air in time lapse photography

1 Commentaire

  1. Denis Galvier

    Plan d’acòrdi amb l’analisi de l’Alan.
    Pas ganhat de servar un festenal vertadièr a Rodes. Mas n’avem un besonh fondamental e doncas, se s’avèra qu’es tampat del costat de Rodes, caldra remenar l’unvers per trapar un autre endrech e de sostens publics per o far endacòm mai.

    Réponse

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.