Aculhits, e de quin biais !, per la Burla de Cessenon d’Òrb, los sòcis de l’IEO 34 visquèron una AG d’una plan bona tinada se ne cresèm los retorns qu’avèm.

AG 2022 IEO34

Dimenge 25 de setembre de 2022– Sala de l’Occitania – CESSENON D’ÒRB

Es sus un gròs 10 oras que lo President Albèrt ARNAUD dobriguèt la sesilha tot mercejant la Burla de Cessenon de sa bona aculhença. Presenta e saluda puòi lo President de l’IEO OPM, Eric Fraj e Catí Lacroix directritz de l’IEO OPM que respondèron de òc au convit de l’IEO34 per se jónher a nautres.

Es evocada la memòria dau paure nòstre Bernat Vivancòs, president dau cercle dau Clapàs e sòci dau CA de l’IEO34 desparegut dins l’annada.

Puòi En. ARNAUD rementa l’òrdre dau jorn :

• 9h30  acuèlh dels participants
• 10h dobertura de l’AG
• 10h 10h30  presentacion et vòtes dels rapòrts morau, d’activitat  et financièr.
• 10h30 – 11h15   paraula als representants dels cercles e associacions
• 11h15 –  12h30   paraule als sòcis
• 12h30  reception de la consola de Cessenon, Maria Pèire Pons, vice-presidenta dau departament d’Erau  en carga de la cultura.
•   Vin d’onor.

Presentacion dau rapòrt moral per Albert Arnaud, dau rapòrt d’activitat e dels projèctes per Domenge Caucat lo salariat de la seccion departamentala, dau bilanç financièr per lo clavaire Danís Plancade.

Los diferents rapòrts son someses als vòtes dels presents.

Compte rendut de las votasons

Participation :

Marcats : 120

Votants : 50

Poders : 16

• RAPÒRT MORAL E D’ACTIVITAT DE 2021  :

Aprovat a l’unanimitat

• BILANÇ FINANCIÈR DE 2021 :

Aprovat a l’unanimitat

Paraula es donada a Eric Fraj lo president de la seccion regionala que, aprèp avedre mercejat la còla dels salariats de l’IEO OPM, Catí Lacroix, Elodia Saunièr, Danís Chaduèlh, abranda son auditòri erautés que s’esperava pas a fèsta parièira. Eric nos liura un discors reivendicatiu que fa lo ligam entre pensaments per la natura e los laguis que nos fasèm per nòstras lenga e cultura. Los Occitans coma primadièrs de l’ecologisme, en lucha per lo drech a la diferéncia e a la diversitat…

Aplaudiments…

Albèrt ARNAUD rapèla puòi la composicion dau CA e fa estat de la demission de Cristian JOUGLA e de Claudi CAUMETTE per rason de santat. Que siagan mercejat per lo temps donat e lo trabalh complit.

Vaquí ont ne sèm :

• ARNAUD Albèrt President
• STENTA Miquèla Vice-presidenta
• ROQUES Micaëla vice-presidenta
• PLANCADE Danís Clavaira
• BOUSQUET Francesa Secretària
• LANDIÈR Miquèl Clavaire adjonch
• THIBAUD Cristòu Secretari adjonch

Los sòcis dau CA son:

• ASTRUC Brunon
• BOUDET Gabí
• ESCAMEZ Catarina
• FRONTY Isabèla
• GROS Bertrand

Una crida es facha per lo President per remplaçar nòstres amics, Silvia Barbassat, presidenta dau fogau rurau de Sant Martin de Londres, accèpta de se faire portar e es elegida a l’unanimitat.

Son puòi las intervencions dels cercles que seguisson. Auràn pas lo temps d’intervenir que Maria Ròsa Viguièr per la Burla ; Miquèla Stenta per lo ceucle setòri ; Annia Bancillon per Mèsa ; Annia Tobena per Massilhan e Agde ; Gabí Boudet per Gabian…

La dòna Pons que ven d’arribar per nos saludar escorcha un pauc la presa de paraula de las associacion. Contacte es pres amb ela per anar pus luònh e préner rendètz-vos.

Après un recapte de tria au restaurant lo Garric -emai per los vegetarians- lo Danièl Cougnenc nos metèt la digestion dessús-dejós amb sas istòrias mai o mens pebradas.

E, RAU…!! a l’an que ven.