Diga ! La mòstra agricòla de París que se ven de clavar metèt a l’onor las bèstias cornudas e es benlèu per aquò que los tòcamanetas, qu’aiman d’embanar son mond, i corrisson coma cabras a la sal.

E pasmens nos dison totes, fòrt e mòrt, de manjar pas de carn, e mai que mai d’aquela de las bèstias que s’apasturan de longa e que puòi  van petar tranquilletas a l’ombra dau chorrador portant antau sa modèsta contribucion au rescaufament climatic. Es mai aisit de faire portar lo capèl a aquelas pauras vacas qu’a sas veiturassas o sos avions privats.

Bon, gardarem lo cambajon, qu’es encara tolerat de manjar pols e pòrcs que son emprenta carbona es mens prigonda, mercé son sistèma digestiu mas l’eco-responsable de la plena pèl, aquel que vòl pas que la bovina s’apasture de ferratge, se deu el d’èsser un brostaire d’ensaladas.

Fòra lo vegetarisme o lo vegetalisme ges de salvacion ! Pasmens a çò que dison los lingüistas lo mot vegetarian designava pas mai a la debuta qu’un marrit caçaire, un que mancava tot…

Vòls que te diga ? Mas per aparar la planeta, basta pas de faire de caçolet sens emprenta carbona e sens mongetas ; de pintrar los trams amb de flors e d’interdire als paures, sabètz aqueles que prenon plaser a rotlar dins de trastes de veituras ronhosas -son cons aqueles paures !- de venir en vila. Me sembla que i a tanben un problèma dau costat dels bicicletaires, que tressusan las sèt pèls dins las còstas e qu’empudessinan e encaronhan antau lo bòn de l’aire.

A Marselha an plan pagelat la situacion. Van metre en òbra de zònas a feblas emissions d’alhòli qu’amb lo bolhabaissa, lo buf cort e fòra d’alen dels ciclistas quand pojan dau costat de la Bona Maire es una vertadièira infeccion !

Enfin, es çò que ne dise, ieu !

La guinhada de l’IEO34. E, rau !

N’avètz aquí l’audio en cas que los de ràdio Lengadòc siagan a la ramassa per lo metre en pòdcats!