Cavalièrs, Sants de glaça, secada !

Abril, mai son dos meses importants per l’agricultura. Las darrièras geladas d’abril son de còps devastatrises (veire las annadas passadas). Se coneis los cavalièrs del freg. Lo primièr es Jorget lo 23 d’abril , seguit de Marquet lo 25 e Tropet lo 29. S’apond tanben St Joan Pòrta Latina lo 6 de mai ; de nombrosas dichas e provèrbis acompanhan aqueles cavalièrs.

Puèi en mai los sants de glaça arriban ! Sant Mamèrt lo 11 seguit de Pancraci lo 12 e Servais lo 13. Coma  se  ditz  : « A  eles tres, fan un pichon ivèrn ! » Pasmens, las geladas de mai son pro raras (cf Meteo França). «  Abans Sant-Servais, ges d’estiu, après Sant Servais, ges de gelada ! » e  los ortalans vos diràn totjorn : « Mesfisa-te dels sants de glaça ! » Mas lo mai preocupant dempuèi mantuna annadas es la manca d’aiga, la secada ! Cal cambiar nòstre comportament, en fasent en primièr atencion al gaspilhatge, al superflú …

Preservar nòstras ressorsas es urgent, se volèm que nòstra planeta nos « supòrta » en arrestant nòstras capbordisas ! Coma l’ai sovent dich, malgrat los progrèsses dins los domenis scientifics (medecina, tecnologia, informatica, coneissença de la planeta…) los paramètres an cambiat en cent ans. Per nòstre canton pichon de Tèrra, França, l’utilizacion de l’aiga es estada multiplicada e la populacion a augmentat passant de 50 milions dins las annadas cinquanta a mai de seissanta sèt uèi ! Alara a l’escala mondiala amb Índia, país lo mai poblat (un miliard e mièg d’abitants!) sèm fòrça pichons e nòstres esfòrces pòdon paréisser pichonets mas cal far quicòm!

Se las datas dels cavalièrs e dels sants del freg son fixadas, que ne serà de la secada e del cambiament climatic ? Tristas annadas a venir ? Lo temps novèl, lo temps novèl… ? Esperam o veire mai clar, lo Temps novèl vertat Bodon ?