«E tu, d’ont siás?». Question sovent pausada! Mas la responsa es pas totjorn aisida.

Per d’unas, d’unes, es dificil de definir un luòc: es lo de la naissença, aquel ont se viu actualament o  … ?

Per d’autres, es : «Soi de  la planeta Tèrra».

Èsser obèrt al Monde, als autres es una  riquesa, los escambis tanben aquò’s segur ! Mas es important tanben d’aver de raices, perque sens raices pas de flors! E las flors viatjan, s’envolan cap a d’autras endacòm mai per far d’autras raices!

La lenga, lo viure amassa, la cultura… son qualques punts (pas los sols) essencials per s’identificar a un territòri …

De nombroses escrivans, cantaires entre autres an escrich, cantat lors raices.

Per illustrar mon prepaus, citarai la cançon (en francés) del Pèire Perret «Soi de Castelsarrasin», supèrbament interpretada -fa mai de 5 ans- per «la tribú de Pèire Perret»: «les ogres de Barback, Olivia Ruiz, Mouss e Hakim e lo grop occitan Lo Barrut».

Lo tèxt de Pèire Perret es un retorn sus son enfància, sa joventut, sas raices occitanas (e mai s’o ditz pas explicitament): «e lo patés me’n remembri» canta lo «Peiròt»! E ditz: «me vau banhar a Garona», torn incorrècte en francés, mas corrècte en occitan que se met pas d’article davant los noms de rius, de flumes, de montanhas…

La cançon es interpretada per Olivia Ruiz que pronóncia fòrça plan  en occitan: «vau al mercat a Sarrasin» tot parièr pelsTolosans (ex Zegba) Mouss e Hakim ,: «mon dieu pichon, te vas negar, fai atencion!». Enfin l’interpretacion en Occitan per Lo Barrut es de primièra !

Vos aconselhi d’escotar aquela cançon (CD o «youtube»).

Anatz, passatz una bona setmana e al còp que ven !

(N’avètz aquí dejós l’audio en cas que los de ràdio Lengadòc siagan a la ramassa per lo pòdcast.)