A la debuta, èra una «sopa» amb de pan  e de toma fresca. Aprèp la revolucion, los païsans l’aprèstan dins los abrics d’estiva : los masucs o burons. Al sègle XIX lo pan es remplaçat per las patanas.

Una legenda mai que mai coneguda : En 590, a Clarmont d’Auvernha, i aviá lo fuòc entre lo rei Eulalius e la femna, la reina ! Alavetz, los evesques d’Auvernha, de Roergue e del Gavaudan s’acampèron per parlar d’aquel afar. Se trapèron sus Aubrac. Aprèp una longa charadissa, avián talent, aquò’s l’aire d’Aubrac ! L’evesque d’Auvernha aviá de pan, aquel de Roergue de toma,de burre e de lach e lo del Gavaudan d’alh e de sal. Un païsan mesclèt tot aquò dins un pairòlas, en bolegant de temps en temps. L’aimèron fòrça e ne volguèron prene dins un bòl. Mas la pasta s’estirava de tot costat e voliá pas venir ! Daissèron las rèstas al païsan e la recèpta venguèt l’especialitat de la cosina d’Aubrac !

Ingredients per 4 personas: 1kg de patanas.1 a 2 grans d’alh, 200gr de crèma fresca espessa, 30 gr de burre, 400 gr de toma d’aligòt fresca, sal e pebra.

Aprestatge:

Plaçar las patanas netejadas e los grans d’alh dins una caçairòla d’aiga fresca e salada. Far bolhir e daissar còire 40/45 mn. Entalhar lo formatge en lescas finas. Far caufar lo lach e lo burre a fuòc lent e servar al caud. Escolar e daissar fregir las patanas puèi las pelar, l’alh tanben. Far una purèa en ajustant la crèma. Ajustar pauc a cha pauc lo formatge sul fuòc lent e barrejar amb un culhièr de fusta pendent 10 a 15 mn…deu fialar! Servir plan caud !

Bon apetís !