Papieròt menerbés (del 24/11/22)

Coma las causas se’n van se sap pas ont, vaquí que nòstra paura comprenèla arriba pas a seguir e es mesa a contribucion per arribar a comprene l’incomprensible !

  • Extradicion : França compren pas que Belgica l’i remete pas un imam perseguit que vòl extradar quand tornarà en França !
  • Racisme : Dire « que s’entorne en Africa ! » a un deputat originari de Senegal o « que s’entornen en Africa ! » pels maluroses recuperats en Mar nòstra, vesi pas tròp lo gra de diferéncia d’expression racista.
  • Darminariá : Protestar un jorn contra aquel prepaus racista e prene mesura per tornar mandar al mai lèu los rescapats de l’Ocean Viking dins lor país d’origina, vaquí la politica coërenta del ministre de l’interior, un interior a pòrtas barradas.
  • Bacinas : Una bacina, aquò èra dins lo temps per se lavar los pès lo dimenge de matin abans d’anar a la messa. Ara, son retengudas d’aiga al profit de l’agricultura intensiva. Aquò permet de fornir d’exercici de plen aire a las fòrças de l’òrdre.
  • Nuclear, òc ! : La Greta Thunberg se declara favorabla al manten de centralas nuclearas en Alemanha. Pensatz que Macarèl va faire tirar pegasolets genre : « Lo nuclear, aquò m’agrada ! »
  • Paures pòrcs : Qu’èra plasent quand ères pòrc de t’agoludar dins la fanga, puèi d’esperar lo farnat quotidian. Degun te veniá enguirlandar s’aviás lo cuol negre (al contrari !). Planhissèm los paures pòrcs chineses embarrats dins de grands HLM, cunhats los uns amb los autres : 650 000 dins un blòc de betum de 26 estatges (lo 26en amb vista sul campèstre ?) e tot automatizat ! Sabi pas se fan freginat lo jorn de la tua del(s) pòrc(s) !
  • Copas del monde : Lo XV se vòl metre a nivèl amb lo fòbal. Los organizaires an la justícia sus l’esquina per comprene unas causas pas clara dins la preparacion de las competicions.
  • Bastisseires : Una de las societats bastissèira dels estadis al Quatar es la meteissa que bastiguèt camps d’embarrament pels Oigors.
  • Chut : La FIFA als jogaires de la Copa del Monde de pauma al pè : « jogatz e vos preocupatz pas del demai ! » Amagatz aqueste malhòt de defensa dels dreits dels òmes e de las femnas (interdiccion faita al Danemarc) ! Aquò nos càmbia dels messatges antiracistas abans las partidas de SuperLiga del XIII !
  • Volontat populara : Fa dos ans los Chilens elegiguèron un president d’esquèrra. Dos ans apuèi, li dison non a una refòrma de la Constitucion bastida d’un biais democratic e ciutadan per n’acabar amb un tèxte del temps de Pinochet ! Vertat que lo tèxte reconeissiá dreits a las minoritats e que tròp sovent/totjorn las majoritats aiman pas las minoritats.
  • Dins lo pòste : Vòli plan anar trabalhar a la television e tocar 40 000 èuros lo mes per dire asenadas, missantisas, servir la sopa a marridas idèias, arribar a faire parlar de se amai que se gaitèsse pas l’emission, mas de fait m’agrada mai vos escriure aquestas regas (sensadas, se possible) en lenga nòstra dins nòstre setmanièr ben-aimat.

IncomprésRouch

low-light photo of railroad tunnel

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.