Diga ! Avisa ! lo cèl nos va tombar lèu sus lo cigarro ! Dintram dins la depression totala, nos dison los badaires dau cèl, los sabentasses que fan la pluòja e lo temps bèl. Lo vortèx polari es a s’afondrar, s’escrancar, s’escagassar… Francament aquò te fica la petarrufa, non ?

Verai que nautres sèm un pauc a l’escart dels camins, mas jamai degun nos parlèt pas d’aqueste vortèx per devinhar la meteo. Nos bastava d’agachar defòra, de legir los vents, la luna empargada, la rogeiròla dau matin o aquela dau vèspre, las pèls de la ceba, los aucèls de passa, e ne passe !, per saupre lo temps que fariá. Aquò tanben, nos l’avián pas dich a l’escòla qu’èra lo vortèx dau pòl qu’o governava tot. Mas ara sabèm. Los sabents que sabon nos o dison : « l’aflaquiment dau vortèx estratoferic poiriá menar en febrièr un freg terrible, absolut, un freg a fendre lo cuol d’un mèrle o… o pas. Que benlèu, dison totjorn, serà lo contrari, una doçor primaverala. Aquela empega ! Son pagats per aquò ? La tanta Nina te diriá risolièira : « quand Serrana carga lo capèl, o plòu, o fa solelh ! »

Vòls que te diga ? E es pas tot. D’autres, d’aqueles barbalongs qu’an la tuca que fuma, nos afortisson uòi que lo nucli de la tèrra s’es arrestat de virar o que seriá tornat partit coma una baudufa, mas dins l’autre sens. D’aquí a te dire de qué ne virarà, es quicòm mai. Tant que vira fa de torns, saique, mas tot es patavirat : de l’estratosfèra au còr de la tèrra que nos aganta ara la tifa-tafa, lo baticòr.

Lo paure nòstre La Sauze, que faguèt pas pauròt tant d’estudis coma eles e que segurament siaguèt pas pagat tant largament, l’aviá pasmens predich : « cossí volètz pas brave mond que la tèrra se botiòle ».

Enfin, es çò que ne dise, ieu !

La guinhada de l’IEO34. E, rau !!

N’avètz aquí l’audio en cas que los de ràdio Lengadòc siagan a la ramassa per lo metre en pòdcats!