Diga ! Quand lo Zelinski passèt per París l’autra setmana, per plorar d’armas de guèrra de mai en mai destructrises, ie donèron en mai la legion d’onor, saique per faire compés a aquela dau Po-Potina.

Prenguèt tanben benlèu un planponh d’idèas que pas pus lèu tornat au sieu faguèt a còp de bariòtas la granda distribucion de barlòcas, ne vòls, n’as, a un chin niflaire d’explosius tot primièr puòi a un fum de veusas e d’orfanèls de son país. Aquò lor fa la camba polida, pecaire !  De los veire a la TV, me rementèt la boiteta polideta comola de decoracions que recebèt la rèira-ma-mameta quand l’oncle tombèt a Verdun, es pas çò que nos lo tornèt pauròt. E pas mai.

Mas que volètz lo medalhatge es mai de mòda d’aquela passa.

E dins lo temps que lo mond fasián lo passa-carrièira per la defensa de son de qué dau l’endeman e de sas retiradas, es lo Jeff Bezòs -catastròfa climaticatica mondiala a el solet e escanapaures de primièira- que lo Macron enrosetèt per servici rendut a l’umanitat, a la planeta tota, e per aver saique capitat el lo pantais mai secrèt dau nòstre president : petar pus naut que son cuol. Lo Raimu auriá apondut : «  lo jorn que faguèron volar los colhons, èra pas a podar la vinha ! »

Vòls que te diga ? Es pas qu’una grand crotz de mai sus l’espatla dau paure pòble que n’es qu’a la començança de son calvari. E un Caramentrant novèl que ven rejónher la legion desonoranta dels Franco, Mussolini, Papon, Potina, Bachard Al-Assad e maites d’aquela negra farina, legiondonorizats dins lo passat. E dins aquel temps nòstres deputats s’enchichorlan, se bandan a triple torn de clau e se cargan la monina a la cambusa de l’Assemblada Nacionala. E siás tu que pagas.

Diga, seriá pas ora de la desrovilhar e de l’onchar la guilhotina ?

Enfin, es çò que ne dise, ieu !

 

La guinhada de l’IEO34. E, rau !

N’avètz aquí l’audio en cas que los de ràdio Lengadòc siagan a la ramassa per lo metre en pòdcats!

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.