Lo cant de las mesengas blavas

• L’aficha enganaira : Sus unes panèus e unas parets de Carcassona, una aficha sang e aur, la crotz nòstra e l’eslogan Volèm Viure al País. Cridètz pas de jòia : en gròs, figura tanben lo logò de Novelum, lo gropuscul drechista. Lo còr me dòl…

• A contra-sens : Dins las publicitats per las veituras marcan ara qu’es aconselhat de se desplaçar en bicicleta o a pè. Quand se parla de cantinas de vin, conselhan de ne pas beure… La publicitat ajuda vertadièrament a la promocion dels produits…

• Manjatz local : Dins un supermercat, una bèla aficha : manjatz local, manjatz francés. Al dejós, produits del canton e de França. Pichona susfàcia rapòrt als taulièrs bèls de frucha e legums que venon d’Espanha, d’Italia, de las Americas e de tota la planeta… Caldriá benlèu cambavirar la situacion e proposar vertadièrament de local e de circuits corts…

• Deculturacion : Los internats catolics de Guiana son estat un luòc fòrt de deculturacion e de francizacion dels pòbles autoctònes. Una tribuna del jornal Le Monde (23/03/24) explica « Los homes indians s’inscrivon dins una istòria coloniala e foguèron lo luòc de practicas coercitivas que la tòca èra de remodelar l’environa culturala e religiosa dels escolans per la proïbicion dels usatges e de las règlas de vida autoctònes, coma la practica de lor lenga e de lor religion per impausar una identitat francesa e catolica. » Lo dreit de l’epòca considerava les estatjants coma una populacion primitiva. Los gendarmas butavan los parents a faire marcar los dròlles dins lo pensionnat ont èran considerats coma orfanèls per rompre los ligams familials. Un Collectiu per la memòria dels homes indians demandan la mesa en plaça d’una comession Vertat e reconciliacion. 2000 enfants son passats dins los 8 establiments que lo darrièr tampèt l‘an passat.

• Justicia generosa : Los tribunals d’America demesisson l’esmenda del president Trompeta de 450 milions de dolars a la soma (vertadièramernt) ridicula de 175 milions !

E el de cridar que deu pagar per çò qu’es pas un crimi : trucar sa declaracion de fortuna e demesir lo pagament de sas talhas. Una singulièra concepcion de la ciutadanetat e dels enjòcs collectius. Cossí fasèm per èsser encara estonats…

• Una revista que manca pas de vam : Vos aconselhi de vos procurar lo n° de l’an de L’ABC del saber qu’es consacrat a l’energia jos totas sas fòrmas : L’energia dens lo mond ; Enjòcs e perspectivas tà doman ; L’energia dens l’istòria ; Solucions navèras ; L’energia e l’uman. E los Occitans tendrem lo còp amb l’energia del desespèr ?

• Visca los esquiròls : Los garrics de l’A-69 seràn pas abatuts (per l’ora). L’accion dels esquiròls establits un quarantenat de jorns dins las brancas, privats sovent de beure e de manjar per las fòrças de policia (probable que caliá pas comptar suls produits farmaceutics Fabre, financièrs de l’autorota, per los sonhar!) a permés de s’apercebre que las mesengas blavas i venián nisar. 
 Los arbres an atal un sursis de sièis meses : lo temps d’abandonar lo projècte d’autorota ?

Mesenguet Roch