Aqueste 31 de març, Jornalet festeja sa tretzena annada d’existéncia. Aquò es quicòm per un mèdia numeric en occitan, una lenga qu’es tròp sovent exclusa e mespresada dins l’espaci public e mediatic. Dempuèi lo primièr jorn, avèm volgut ofrir un espaci de referéncia per totas las personas qu’aiman nòstras lenga e cultura, un espaci ont legir cada jorn d’actualitats e d’opinions, soscar, comentar e, sustot, far comunautat.

Dins aquestes tretze ans, avèm publicats d’articles de tota mena: de politica lingüistica, de musica, de cinèma, de literatura e de la vida vidanta en occitan. Avèm donada la paraula a de collectius e d’iniciativas que trabalhan per la lenga, e avèm vist cossí, malgrat las dificultats, la brasa de la lenga es totjorn ardenta e prèsta per alugar la flama de l’occitan, un esperit que demòra viu e que desvelha l’interès de nòvas generacions. A mai, avèm adaptada nòstra preséncia a de nòus canals e formats amb la toca de contunhar d’èsser utils dins un Mond que càmbia cada jorn.

Ara agacham endavant amb l’enjòc de contunhar nòstra evolucion. A mai de nòstra preséncia numerica quotidiana, trabalham per una edicion en papièr, un tresen numèro de Jornalet en format revista, per refortir nòstra preséncia dins lo mond fisic e porgir una experiéncia de lectura desparièra e reflexiva. Contunham tanben de cercar de nòus biaisses de connectar amb los joves, una generacion que s’interèssa totjorn que mai a l’occitan mas que a de besonh d’espacis per lo viure.

Aqueste anniversari es tanben l’escasença de grandmercejar totas las personas que nos seguisson, nos sostenon e fan venir possible aqueste projècte. Jornalet existís gràcias a la comunautat que lo legís, ne parteja los contenguts e i participa. Sens totes vosautres auriá pas de sens. De remembrar que podètz ajudar financièrament en aderent a l’associacion dels Amics de Jornalet o simplament en fasent un don.

Per aver de longas annadas d’informacion en occitan, per bastir lo país ensems.