Mot del president – julhet-agost de 2026

Mentre que lo calimàs e la calorassa estivencs nos aclapan d’un biais pro dorièr, los meses de julhet e d’agost nos ofrisson tot un fum de rendètz-vos importants per la lenga, la cultura e la creacion occitanas, de l’Universitat occitana d’estiu -que duèrp julhet- a l’Escòla occitana d’estiu e Hestiv’òc -que clavan agost-, en tot passar per l’Universitat d’estiu de la Guépia, Festen’Òc, l’Estivada, los Rescòntres occitans de Provença, e fòrça mai que me desencusi d’oblidar.
Pertot son d’animacions nombrosas e d’espectacles variats qu’illustran la vitalitat de las iniciativas e de la creacion occitana e en occitan. S’aquò fa gaug e s’es important d’o portar a l’endavant, es tanben important de remembrar que l’occitan se pòt pas resumir a un periòde de l’an e a unes moments, foguèsson màgers. Es segur qu’aquestes eveniments los cal sosténer e cal que se multipliquen, al còp per donar mai de visibilitat a nòstra lenga -e n’a mai que besonh- e per permetre als creators de trobar un public e far conéisser çò que fan. Mas, tanben, nòstra tòca es que la difusion se’n fasca long de l’annada, pertot e per totes los mejans: es una jòga tras que granda per l’occitan.
Per l’Institut d’Estudis Occitans, coma ja o escriguèri, lo mes de julhet se comença per un doble eveniment important lo 4 de julhet en Val d’Aran: la signatura d’una convencion de collaboracion e de representacion recipròca amb l’Acadèmia aranesa dera lengua occitana e la tenguda d’un rescontre sus la normativizacion de l’occitan qu’i participan d’especialistas de l’occitan mas tanben del catalan e de l’aragonés. Cada intervenent i exprimirà sa sensibilitat per la lenga sus una question qu’es pas de negligir. En rason de l’importància de l’eveniment, en mai dels intervenents, una delegacion del burèu federal de l’IEO serà presenta. L’acte es public e s’i volètz assistir o se volètz mai d’entresenhas, se pòt escriure a secretaria@institutestudisaranesi.cat.
Après lo triptic sur Marcela Delpastre, degut a Miquèla Stenta, que foguèt presentat a l’AG de Juèsa en mai passat, lo libret publicat a l’escasença de la jornada aranesa del 4 de julhet serà lo segond resultat concret de la collaboracion entre las doas entitats d’aparament e promocion de la lenga nòstra. Es d’esperar qu’aquestas doas primièras realizacions seràn seguidas de mai. En tot cas, ara meteis, cal que mercege l’Acadèmia aranesa dera lengua occitana per sa generositat cap a l’IEO. De tot biais, per l’IEO, es una reconeissença importanta e un pas istoric, resultats d’una volontat compartida d’obrar amassa.
Pel demai, los lectors sòcis de l’IEO auràn normalament recebut abans aquestes Ressons lo compte rendut de l’AG tenguda en Juèsa los 8-9-10 de mai passats, amb los rapòrts moral, d’activitat e financièr qu’i foguèron presentats. Atal, i auràn pogut legir un resumit de l’accion passada e las questions que, ara, se pausan. I tornarai pas, sonque per dire que, dempuèi l’AG, qualques causòtas an avançat demest los problèmas màgerment materials que trobèrem e que nos an ocupats e preocupats de longa pendent lo primièr an del mandat. Lo burèu de Tolosa foguèt voidat e mudat gràcias a l’accion de Daidièr Mir, ajudat per una còla de valents que mercegi; las òbras del tet de Puèglaurenç poiràn començar après la responsa tant esperada (un an) de l’assegurança; lo domeni de Hòrgas, eretat en 2001, comença d’èsser mes en venda… Mas vos rasseguri: ren es pas acabat e de trabalh n’i aurà encara per totas e totes e, mai que jamai, comptam sus vosautres totes! Bon estiu.

Patrici Pojada