L’annada 2022, es acabada ! Una annada pas excepcionala : guèrra en Ucraïna, rescalfament climatic, economia inflacionista, misèria dins fòrça país… Òc lo mond va mal coma vos o ai pogut dire sovent !

Mas vòli gardar mon costat « carpa diem », perque consí renversar las montanhas ? Coma far comprene al mond qu’anam dins la paret ? Viri en redond dempuèi d’annadas, tròbi pas la clau, òc se ditz : lo qu’a la clau  de sas cadenas se desliura ! Mas las cadenas son nombrosas, de quinas cadenas  se desliurar ?

Alara, ensagi de far passar la lenga per d’istòrias, anecdòtas e qualques idèas coma uèi, mas es pichon, pichon, pichon !

Per 2023, que se pòt desirar a nòstre Occitània (pas  solament la region administrativa ) ? Benlèu un pauc mai de consideracion, non pas per èsser un pòble « superior », aver una lenga al dessús dels autres mas reconéisser las diferéncias, la riquesa de las culturas…Vau pas contunhar dins un discors mila còps escrich, ausit (o escotat???), non vau modèstament contunhar lo trabalh de transmission de la lenga, de la cultura,  de las valors per ajudar a bastir una societat mai conviviala, mai responsabla…Es çò que volèm ,mas l’obrador es enòrme, aicí coma dins lo mond.

Alara, cal trabalhar a nòstre nivèl… pichon ! Vos contarai d’istòrias, vos parlarai de çò qu’ai descobèrt dins la nòstra region e en delà, asajarai de vos esgaiar per d’istòrias, anecdòtas, serai tanben vòstre pòrtaparaula s’avètz de racontes, istòrias a me transmetre, ensajarai de contunhar aquela mescla («Lo mescladis ») sens autra pretension, es a dire : vos divertir e vos far sorire.

Alara bon ressopet e a l’an que ven 

Dins l’espèra que ràdio Lengadòc trapèsse una solucion a son problèma de personal per metre a jorn los podcasts vos prepausam l’audio de la setmana aicí dejós. Bona escota.