CURIOSÈR
Una cronica de l’Eric Asti�
Per parlar un pauc de tot e de tot un pauc
D’escotar tanben sus Ràdio Lengadòc !
Besson nascut sol
BESSON NASCUT SOL
Adissiatz mond de Ràdio Lenga d’Òc e adishatz plan.
Alavetz, cossí vos sentissètz uèi ? De veta ? Flame ? Avètz vòga o pas ? Aital aital ? Tristonets ? Deprimits ? Depressius ?
Ne fa de questions un pauc brusquetas. Ieu, quand qualqu’un me demanda coma aquò vai, respondi generalament : vau.
La responsa positiva plan e aquela negativa mal (rarament dita), an pas la meteissa significacion dins totas las bocas : la miá, la vòstra, la de la vesina, del collèga etc.
Respondre un « me sentissi » precisat per un adjectiu : gaujós, trist, fatigat, encanhat, tranquille, flame, anant, inquiet, estrambordat, es mai autentic.
E aquí òi, i a una responsa de las vertadièras que càmbia gandre (advèrbi sinonime de pro, fòrça, passablament) gandre, de la responsa fadassa va plan a la sempiternela question : cossí va, coma vai, quin va, com va e companhiá. Aquel va plan sistematic se recapta dins un biais que non engatja degun ni res.
I a de bilances que tòrnan e que dòlon = capiti pas de capitar… per exemple las relacions.
- mas amors duran totjorn lo temps de las vendémias,
2 . tombi de longa sus de brèlas,
- los amics me comprenon pas,
- dins la família soi una cometa quand los autres son ja dins lor sistèma solar,
- tròbi pas ma plaça en societat,
- sempre ai una impression de manca,
- Per far cort : ai pas bonastre.
Varianta : per tant que m’aplique i pas res que foncciona.
=> Estagis de desvolopament personal, coaching, sofrologia, pensada positiva, psicoterapias de tota traca, memòria cellulària, meditacion en plena consciéncia… Total fracassum…
Levat que, i a una pista a la quala i avètz pas pensat. Simpla, naturala e vièlha coma un camin : aquela del besson nascut sol.
La bessonada es una pura meravilha, un estonament cande de veire dos èssers practicament identics fisicament e mentalament.
Es lo sòmi de qualques maires de família e que se poiriá realizar dins un percentatge consequent dels emprenhaments. Lo còrs medical estima a 15 % lo nombre dels emprenhaments bessonats.
Mas dins aqueste percentatge, sol 1 emprenhament de 8 dona naissença realament a dos nenons. Tots los autres fan nàisser un sol nenon.
Es una realitat plan coneguda de la medecina e que comença de se far saber ara dins lo grand public. En Belgica e en Alemanha s’i interèssan dempuèi bravament de temps.
Anatz dire de qué càmbia, fòra del nombre de naissenças ? Pels bessons nascuts sols aquò càmbia tot.
La generalizacion de las ecografias a partir de las annadas 1980 permetèt de conéisser lo sèxe e lo nombre dels fètusses per cada prenhament. Abans, per èsser assabentat èra la lotariá de las jasilhas, çò que fa que fòrça mond son de bessonas e de bessons nascuts sol.a.s, sense zo saber.
De mai, los mètges ne parlavan pas a las famílias, siá consideravan que solas las jasilhas finalas comptavan e que valiá pas lo còp de s’embarrassar de causas malseguras, siá volián pas donar de falsas esperanças a las maires e pensavan aital en gardant lo silenci, de lor evitar una decepcion dolentosa.
Tostemps estar que lo fait medical del besson nascut sol, sonat tanben mièg besson, a longainejat per èsser acceptat e reconegut dins la societat francesa quand d’autras culturas avián ja trabalhat la question dempuèi d’annadas.
Doncas lo fenomèn del besson nascut sol, a l’origina de l’Umanitat, es pres en compte medicalament pas que dempuèi un quarantenat d’annadas. E i a mai qu’aquò. Sabèm la complicitat, la relacion fusionala, la complementaritat extrèma dels bessons. Sabèm que l’un es perdut quand l’autre i es pas, alavetz de qué adven d’una persona qui a perdut son besson abans la naissença ? La seguida lo còp que ven…
Adissiatz mond de Ràdio Lenga d’Òc, adishatz plan e prenètz suènh de vosautres.
0 commentaires