La Passem 2026 es en camin, en traversant Gasconha de cap a cap, quilomètre après quilomètre, amb la fòrça d’una lenga que se vòl pas calar. Del 30 d’abril e fins al 9 de mai, son mai de 2000 quilomètres que jonhon vilas e vilatges ont un relèu es portat per de centenas de personas en movement per l’occitan. Saludam La Passem, saludem-la totes!
La Passem es pas solament una corsa. Es un pòble en movement. Es un vam collectiu que ditz, fòrt e clar, que la lenga es totjorn aicí, e qu’es a nosautres de la far avançar. Cada passa, cada relèu, cada «Adishatz!» cridat al bòrd de l’estrada es un acte de resisténcia e d’esperança.
Mas i a una autre biais de participar, tant essencial coma córrer: crompar de quilomètres. Crompar un quilomètre es pas un simple gèst simbolic. Es donar de mejans concrets a de projèctes que trabalhan cada jorn per la transmission de la lenga. Es ajudar d’escòlas, d’associacions, d’iniciativas que, sens aquel sosten, poirián pas existir. Es dire: «Òc, aquò es important. Òc, aquò merita de viure.»
Dins un moment ont la transmission familiala demòra rara e fragila, ont l’occitan se bat per trobar sa plaça dins la vida vidanta, cada accion compta. E aquí, l’accion es a la portada de totes. Podètz anar veire passar lo relèu, encoratjar los correires, participar a las animacions long de tot lo camin. Podètz jónher la corsa, far qualques mètres o qualques quilomètres. E, sustot, podètz crompar un tròç d’aquel camin. Perque, en realitat, çò que cromparetz es pas solament un quilomètre mas un bocin d’avenir.
Que la lenga avance, e que la passem, amassa!
0 commentaires