La vinha e lo vin : istòria de la viticultura, anecdòtas, racontes…(1)

Pendent mantuna setmana anam dobrir un dorsièr sus « lo miègjorn viticòla » e particularament la region de « còr d’Erau »: brèva istòria de la vinha, lo vin e sas apellacions mas tanben de las anecdòtas, testimoniatges, racontes de còps cruissents sus la vinha e lo vin.

Deman es lo primièr de setembre. Un mes qu’evòca lo temps de vendémias.

Lo trabalh a cambiat dempuèi los grècs qu’an introduch la vinha dins nòstre miègjorn cap al sègle V abans nòstra èra!

Las crisis, las malautiás de la vinha  dels sègles 19  e 20 foguèron de moments fòrts, de còps dramatics del « Miègjorn Roge ».

A l’ora d’ara lo trabalh sus la qualitat, lo rendement, los progrèsses tecnologics, la consomacion, la mondializacion an cambiat  la vida del « mond de la vinha » .

Fòrça cooperativas barrèron aquestas annadas. Mas d’unas se son regropadas, an trabalhat sus la qualitat e los resultats son encoratjants.

De domenis , « castèls » espelisson. Lo vin de Lengadòc a una vertadièra notorietat. Segur, es pas simple : los problèmas de venta son de còps presents e la metèo es una angoissa permanenta : secada, granissa…

La viticultritz e lo viticultor son venguts de gestionaris, de comercials per far conéisser lors vins. Las cooperativas, los domenis o castèls prepausan d’activitats divèrsas : exposicions, animacions a l’entorn de fèstas, bandas, restauracion… Es una transformacion del mond de la vinha dins Lengadòc qu’a pas res pus a veire amb la produccion de massa dels sègles precedents.

La setmana venenta cercarem los divèrses A.O.C,  A.O.P,  I.G.P. de vins de nòstre « còr d’Erau »

Zon al còp que ven !