Acomolòfis

 

Diga ! Dins las vilassas e sas periferias son a metre en plaça de vias de circulacion reservadas als bons ciutadans que siái pas. Aqueles que se pòdon crompar la veitura electrica o que practican lo coveituratge a dos o tres, solets, auràn drech d’i rotlar. Capitèsses pas de cargar una autostopaira crocarèla sus lo camin dau trabalh -es que per aquí, en plena garriga, pecaire ! i a mai de singlars que de majoretas- seràs amb los autres peterroses cunhats dins los acomolòfis, d’oradas a te rosigar dins los  encombraments, a escotar ràdio Lengadòc, dins lo temps que pesolhs revenguts e ecolo-bobos te passaràn davant dins la fila reservada als bons electors de las metropòlis.

Vòls que te diga ? Lo vesin trapèt lo mejan de colhonar los radars de contraròtle de la preséncia de doas o tres personas per carris. Lo te vese l’autre matin que conflava, que conflava -confla que conflaràs una petonta conflabla.

  • – Òu, que fas aquí ?
  • – Ben, o veses pas ? Confle !
  • – Vese ben, mas es pas l’ora de s’anar colcar e sabe pas se ta Germana serà contenta de partejar los lençòls amb aquela particulara…
  • – Grand colhon ! Es pas per la metre dins lo lièch, es per la veitura. L’estaque a mon costat, e rau !, colhone los radars. Nos creson a dos dins lo carri. Veja-me aquí a tota bomba dins la via reservada.
  • – Francament, es pas polida, polida ta darrièira conquista…
  • – O sabe ben. La crompère d’ocasion sus lo Bon Canton, es pas una primièra man, se gause dire. Mas n’i a pas pus enluòc, la combina comença de virar sus internet, lo mercat de la peteta conflabla espeta !

Partiguèt.

Quauques jorns puòi piquèt a la pòrta, fasiá un morre de tres palms :

  • – Me voldriás pas prestar lo chin ?
  • – Qué ?
  • – Òi, ton chin per anar au trabalh. M’an fotut de camèras termicas e m’an empegat aqueles ensucats amb la petonta. Una prunassa de las saladas ! En mai, los blaus se trufèron de ieu…
  • – Te caliá la rescaufar, innocentàs ! Es que lo chin, n’ai de besonh per anar a la trufa
  • – D’aquò, rai. Te prestararai la tostona a la plaça.
  • – Òu, siás conflat e mancas pas d’aire ! Me veses per los bòsques amb ta bagassa de caotchoc ? Una radassa a la rabassa. E creses pas que li vau dire mos cantons a campairòls ? Non ?

Enfin, es çò que ne dise, ieu…

 

La guinhada de l’IEO34. E, rau !

low angle photo of concrete bridge

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.