Frasòtas d’actualitat…

L’actualitat vai, ven e vira : just lo temps de n’agantar quauqua pensada e d’analisar tòcas e perspectivas…

• Crisi ecologica : Fàcia la situacion ecologica, lo president Macron refusa d’anar al carbon !

• Evidéncia : Lo glifosata es reconegut dangierós : en tota logica, se ne pòt perseguir l’utilizacion.

• Autorotas : Pro de dobrir e alongar autorotas, mas un còp que serà acabada la ligason Tolosa-Castras (per començar/contunhar…) !

• Algas verdas : Un film de véser : Les algues vertes. Una brava demostracion dels dangièrs de l’agro-industria e de las collusions poders-(in)justícia-FNSEA.

• L’anti-Larzac : Un libre occitan e uman de legir : Leis inaudibles, del Didièr Mir (ed. Édite-moi). Cossí l’armada voidèt un vilatge de Var de sos estatjants en 74 per espandir lo camp de Canjuèrs.

• Victòria ciutadana : En Canaquia, l’independentista bat la secretària d’Estat a la ciutadanetat per las senatorialas.

• Descafeinada : L’autonomia proposada per Corsega, los mots sens lo contengut.

• Calor : La primièra ministra francesa anóncia que la temperatura va tornar pujar a 49°3 a l’Amassada nacionala. 

• Manifestacions : Ne sèm a manifestar per aver lo dreit de manifestar…

• Angleses : La tòca secrèta del passatge de Carles III a Bordèu èra d’envisatjar las condicions del retorn d’Aquitània a la corona anglesa.

• E qun pintre !: Quand s’embestiava coma Dalfin, lo rei anglés pintrèt en 2004 una aqüarèla per l’etiqueta d’un Château Mouton Rothschild ! Benlèu que veniá de legir Lo Prince pichon : « Dessenha-me un moton ! »

• Piuses : Los gosses besierencs n’an pas pro de las piuses vertadièras. An dreit de mai a una piuse electronica per los empachar de cagar per carrièras !

• Valentisa : Aparentament, los moissals-tigres coneisson pas la pigresa.

• Secretari perpetual : Amin Maalouf, secretari perpetual novèl de l’Academia francesa, coneis almens l’istòria de l’amor de lonh del Jaufre Rudèl (un libre seun que l’Andrieu Clamenç revirèt en lenga nòstra).

• Esper : Aprèp la nafradura del capitani del XV blau, l’entrainaire canturleja : « L’Antòni, lo vòli… ! »

• Malaisit : Expression rugbistica novèla : « Malaisit coma un quinzista australian »

• Badaira : A badar lo Papa al Velodròme, Nòstra-Dòna de la Garda doblidèt de venir en ajuda a l’OM al Pargue dels Princes. L’indigna Bona Maire abandonèt sos enfants.Resulta : una brava desfaita 0-4 !

• Consequéncia : L’OM cèrca un entrainaire en CDD, fins a la crisi venenta…

• L’ors vinhairon : Crompat una cantina de vin de Bearn etiquetada « L’ours mal léché » (L’ors mal lupat). Un vin de las vinhas de Joan-de-l’Ors ?

• Lipetariá d’enfança : Crompats al mercat del terrador del Festi-Canton de Sopèx (Lauragués), tres pòts de confiment : pastèca ; tomata verda ; persècs de vinha…

Chapa-actu Roch