Zonzonadas d’insèctes

Per èsser reconegut mondialament coma occitan, pensi que val mai èsser entomologista coma lo Joan-Enric Casimir (globi-bolgà?) Fabre que poèta o cronicaire. Alara, sus las piadas del felibre dels tavans, tenti lo còp e vos fau part de mas constatacions entomologicas: 

• L’abelhard cèrca son Eloïsa.

• L’arna es nharruda e trabalha per Temu.

• La babaròta manja pas carròtas.

• Lo babau se demanda «I vau o i vau pas?»

• Pas aisit de trapar un deodorant per un bernat-pudent.

• Lo bigal se vestís de tergal.

• Al calabrun, restontís lo crit del bordon.

• Amagatz los cafards dins los placards!

• Bavarilha de cantarilha passarà a la grasilha.

• Bronzina que bronzinaràs, ganharàs pas la medalha d’aur, nimai una prima d’argent.

• Buthus occitanus prenguèt part al passa-carrièras de Carrièras occitanas.

• Lo capricòrn se desplaça en Zodiac.

• Lo cascalhon es bravament cascalhat.

• La catarineta manja meleta per Pasquetas.

• Cigala e cigalon de l’estiu son la cançon.

. Cigala de felibre crenta lo gelibre.

• Non… Non… Sissi la cigala a pas la gala!

• Lo criquet tusta de totas sas fòrças dins la pauma.

• Als temps glaciaris, vivián los cortbrics. Tenguèron pas lo còp a la diferéncia dels lombrics.

• Qual-a a la cuca pòt virar sa cutia.

• Se pòt pas discutar amb una cuscuta. 

• Las domaisèlas an jamai mal a las costèlas.

• La domaisèla se crei bèla, mas sas alas son freulas.

• L’escolopendre s’anèt faire penjar endacòm mai.

• Piu-piu, l’escorpiu, totjorn viu!

• Long del riu, l’escorpiu cèrca un fiulet.

• La formiga se met en quatre per sas amigas.

• Interdisètz lo salon als forsalons.

• A Cantagrilh, lo sèti del Grèlh roergàs.

• Color roja brica lo lombric.

• La luseta, lumenon dins la nuèit.

• Lo mila-patas auturós se crei lo primièr de mila.

• Fa plan de camin per una mosca d’anar a Moscó.

• Los moissalons se convidèron al Salon del Vin.

• Nièira e nièirons especializats dins lo triple saut.

• A Artigas, Dieu te presèrve de las pantigas.

• Totes los parpalhòls son pas parpalhòts.

• A la gara, los pesolhs revenguts crosan los pesolhs partents.

• Maria-Ròsa es l’enemiga d’Escracha-pesolhs.

• Un saut de piuse pòt cambiar lo sòrt del monde.

• Prega-Bernada pòdes totjorn pregar lo diable sul pregadieu.

• Sautarèl e sautarèla jamai lasses: pas de besonh de trampolina!

• Los tavans a l’ostal/al magasin/al mercat/…… i van.

• Trauca-pè/perce-oreille: lo traucaire bilingue cèrca son camin entre pè e aurelha. 

•• Las vèspas (l’insècte) se son reservadas l’exclusivitat del mercat de las Vèspas (vrom-vrom! las petarèlas)

• …

Sabi pas s’aquel estudi es pro significatiu per obténer una reconeissença internacionala e una borsa d’estudis al Japon. Se l’es pas, res empacha la Naoko Sano de m’emportar dins sas malas quand tornarà al país…

Babaròt Roch