Ongan, pel primièr còp de son istòria, la vila de Narbona aculhirà una Marcha de las Fiertats. S’agís d’un eveniment que representa pas solament una celebracion, mas tanben una revendicacion de dreches fondamentals que, malgrat las avançadas legalas e socialas, encara son pas respectats. Quand Jornalet raportèt l’iniciativa, qualques comentaris a nòstra publicacion mostrèron una transfobia que nos inquieta.

Sèm arribats a una epòca que los discorses d’asirança se fan ausir tròp aisidament. Per aquela rason cresèm qu’es essencial de remembrar que los dreches del collectiu LGBTQI+, e en particular los de las personas transes, son pas una invencion ideologica autoritària ni una conspiracion, mas un exercici basic de justícia e de dignitat. La lucha per l’egalitat grèuja pas degun, lèva pas cap de drech a cap d’autre collectiu ni d’autra persona ni obliga degun de pensar d’un biais precís. Reconeis simplament l’existéncia e l’umanitat de totas las personas, sens excepcion.

Las personas transes, coma quina autra persona que siá, an drech de viure sens paur, sens discriminacion e sens aver de justificar lor identitat davant una societat que tròp sovent, per ignorància, las rebuta e fòrabandís. Lor existéncia es pas un debat, mas una realitat. Lor refusar de dreches basics, los tractar de malauts mentals coma se fasiá amb los omosexuals, remetre en causa lor identitat o difusar de discorses d’òdi contra elas es una violéncia que deuriá pas existir dins una societat democratica e respectuosa.

La primièra Marcha de las Fiertats a Narbona, doncas, es pas solament un fach istoric per la vila, mas tanben una escasença de far venir vesidoiras aquelas luchas e de bastir una societat mai justa e inclusiva. Qu’aquel eveniment siá lo ponch de partença d’una reflexion collectiva sul respècte e sus la convivéncia. Tot comptat e rebatut, convivéncia e paratge son de valors fondamentalas de la civilizacion occitana. Totes avèm drech d’existir en plenitud e en libertat, non?