L’UÒLH DEL BUÒU
LA BILHETA DE L’IVONA DEL CERCLE OCCITAN DE MÈSA.
Ivona BEAUME, Mèsa, lo 24 de març de 2023.
CHAT GPT
Per lo melhor e per lo pièger.
Per los mens iniciats, l’anonci de la mesa a disposicion pels internautes del sistèma CHAT GPT a fach l’efèit d’una bomba.
Mercé a l’Intelligéncia Artificiala, aquel otís informatica permet d’escambiar amb el una conversacion escricha. Pòt atanben, a partir d’una consigna que se sona « Pròmpt », assegurar la redaccion d’un tèxte a la vòstra plaça. S’adapta a un fum de subjèctes e estiles de lengatges. De mai es capable de vos mostrar de fòtos d’aparéncia realas e pasmens falsas. Òm imagina las consequéncias quand serviràn de pròvas dins una enquèsta criminala, per exemple…
CHAT GP es pas calhat e pòt evoluïr, es a dire apréner tot sol cada jorn de donadas novèlas. Pr’aquò s’inspira de la premsa, dels libres, dels filmes, de la television…Tot aquò baila lo vertitge…
Per faire cort, es un otís capable de rendre de servicis dels bèlses, en particular dins las entrepresas. Segur que se cargant de tacas que pòdon èstre longas e fastigosas, unes còps son utilizacion plan mestrejada, aquò farà ganhar fòrça temps, e lo temps es d’argent.
Atanben, coma tot sistèma novèl, merita d’èstre emplegat dins un encastre plan securizat… s’es encara possible.
Ja, dins las escòlas, los professors crenhon que los escolans daissen a CHAT GPT lo suènh de redigir la dissertacion a lor plaça pendent qu’anaràn se desgordir las cambas amb lors camaradas sus un terren d’espòrt o autre divertiment.
Dins una letra de motivacion per descrocar un emplec novèl, lo cap d’entrepresa serà en mesura de se demandar s’aquela candidatura tant perfiècha es l’òbra del candidat o de CHAT GPT. Sens parlar de tot çò qu’imaginam pas pel moment.
A prepaus d’imaginacion, espèri que l’Uman gardarà totjorn la sieuna, que les òmes son pas (encara) de robòts. Cal tot faire per qu’o venguèsson pas. Çò que fa la sal de l’Umanitat es plan sa diversitat.
Per contra, utilizar las immensas possibilitats ofèrtas per l’Intelligéncia Artificiala, signe de progrèsses qu’arrestarem pas, perqué pas ? Mas a costat e en bona plaça, cal preservar una autra Intelligéncia, la de la vida e del còr, qu’aquela a ges de prètz.
Pasmens, ai de mai en mai enveja de l’ensajar aquel CHAT GPT. Tè, me’n vau li demandar d’escriure mas bilhetas en lenga occitana, mentre que los bèlses jorns arribant, m’anarai espandir sus la plaja amb un bon libre ieu.
CHAT GPT
Pour le meilleur et pour le pire.
Pour les moins initiés, l’annonce de la mise à disposition des internautes du système CHAT GPT a fait l’effet d’une bombe.
Grâce à l’Intelligence Artificielle, cet outil informatique permet d’échanger avec lui une conversation écrite. Il peut aussi, à partir d’une consigne qui s’appelle « Prompt » assurer la rédaction d’un texte à votre place. Il s’adapte à beaucoup de sujets et de styles de langages. De même il est capable de vous montrer des photos d’apparence réelles et pourtant fausses. On imagine les conséquences quand elles serviront de preuve dans une enquête criminelle, par exemple…
CHAT GPT n’est pas figé et peut évoluer, c’est-à-dire apprendre tout seul chaque jour de nouvelles données. Pour cela, il s’inspire de la presse, des livres, des films, de la télévision…Tout cela donne le vertige…
Pour faire court, c’est un outil capable de rendre de grands services dans les entreprises. Il est sûr que se chargeant de tâches qui peuvent être longues et fastidieuses, une fois son utilisation bien maîtrisée, cela fera gagner beaucoup de temps et le temps c’est de l’argent.
Aussi, comme tout nouveau système, il mérite d’être employé dans un cadre bien sécurisé…si c’est encore possible.
Déjà, dans les écoles, les professeurs craignent que les écoliers laissent à CHAT GPT le soin de rédiger la dissertation à leur place pendant qu’ils iront se dégourdir les jambes avec leurs copains sur un terrain de sport, ou autre divertissement.
Dans une lettre de motivation pour décrocher un emploi nouveau, le chef d’entreprise sera en mesure de se demander si cette candidature parfaite est l’œuvre du candidat ou de CHAT GPT. Sans parler de tout ce que l’on n’imagine pas pour l’instant.
A propos d’imagination, j’espère que l’Humain gardera toujours la sienne, car les Hommes ne sont pas (encore) des robots. Il faut tout faire pour qu’ils ne le deviennent pas. Ce qui fait le sel de l’Humanité c’est bien sa diversité.
Par contre utiliser les immenses possibilités offertes par l’Intelligence Artificielle, signe de progrès que l’on n’arrêtera pas, pourquoi pas ? Mais à côté et en bonne place, il faut préserver une autre Intelligence, celle de la vie et du cœur, car celle-ci n’a pas de prix.
Pourtant, j’ai de plus en plus envie de l’essayer ce CHAT GPT. Tiens, je vais lui demander d’écrire mes billets en langue occitane pendant que, les beaux jours arrivant, j’irai m’affaler sur la plage avec un bon livre moi.
0 commentaires