A la nòça dels malmaridats…

Per aquesta cronica, esponsorizada per la LPA (Liga de Proteccion dels Aucèls)(°), avèm fait rampèl a l’unic especialista reconegut en malmaridatologia: En Alban Tartic (de Malatavèrna). Vaquí doncas, en exclusivitat (sabètz pas l’astre qu’avètz!) las informacions e los questionaments qu’aprèp annadas d’estudis e d’observacions sul tarrenc nos/vos a plan volgut fisar:

– Un maridatge: bona o marrida novèla cò dels malmaridats?

– I pòt aver maridatges uroses cò dels malmaridats?

– Se pòt nomenar malmaridat un celibatari?

– Cossí se negocian los divòrcis cò dels malmaridats?

– Es pas una bona idèia de dobrir una agéncia matrimoniala en territòri malmaridatenc.

– Lo ser, per endormir los aucelons, los parents malmaridats contan als pichons l’istòria imaginària de Planmaridat.

– Lo malmaridat melomana (???!!!) deten un vinil de Malicòrna .

– Es defendut, cò dels malmaridats, d’escotar la cançon del Brassens: la non-demanda en maridatge. « Ai l’onor de pas demandar ton ala…»

– Los malmaridats organizan una virada de recitals per la Mal-Cofada.

– Cant tradicional: « Malmaridat, malmarida-te…»

– Aquí la clica dels malmaridats: malachin-bom-bom!

– Un malmaridat malsapiós es pas de bon frequentar.

– Los malmaridats an cap de nocion del Ben e del Mal.

– Se coneis pas de malmaridat dualista.

– Quand siás malmaridat, val mai èsser mal-bas que mal-aut.

– Lo malmaridat maliciós se’n sortís totjorn.

– Lo malmaridat malcontent es plan malurós.

– Lo malcontentament es de règla cò dels malmaridats.

– Mal de còr, mal de cap, mal dels pès, mal de dents, mal d’uèlhs, mal d’endura, mal d’estomac, mal d’òs, …: lo malmaridat se sentís maldit, perseguit pels maleficis.

– Mala diccion o malediccion pel malmaridat quequejaire?

– «Baragoinas coma un pingoin!» es una insulta cò dels malmaridats.

– Los malmaridats coneisson pas lo mal de mar.

– Mal-nascut o plan-nascut, acabaràs de tot biais malmaridat.

– La malmaridat malfatan es un vertadièr malfasent.

– Lo malmaridat ranc trantòla.

– Se coneis l’atge del malmaridat al nombre de ridas (rufas, se volètz) a l’entorn de sos uèlhs.

– S’es jamai vist un malmaridat amb un nos-parpalhon o una cravata.

– Lo malmaridat cocut enveja lo chòt banut.

– Malgovèrn senhoreja cò dels malmaridats.

– Al malmaridat, li agrada mai l’anarquia que lo malgovèrn.

– En temps de conflicte, los malmaridats utilizan la malavesina.

– Lo malmaridat revoltat a penjat dins son nis un retrach de Malcom-X.

– Cossí venir amic d’un malmaridat malgraciós?

– Se parla totjorn dels malmaridats e jamai de las malmaridadas!

– Per la ceremonia, se vestís de blanc la nòvia malmaridada?

– Pas besonh de verquièra per las malmaridadas.

– Es pas de te sonar Esmeralda que farà de tu una polida malmaridada!

– Las malmaridadas tricòtan pas qu’amb de lana Pingouin

– Un malmaridat es jamai a l’abric d’un mal-rescontre.

– Non, los malmaridats vivon pas sus l’iscla de Malta, nimai a Malmö.

– S’es jamai vist un malmaridat caçar lo singlar en Malapèira.

– Lo mal-temps es bon temps pels malmaridats.

– Dins lors contradas frejas, los malmaridats patisson la malamòrt.

– Rescalfament: Se lo glaç fond, vendrà lo temps de la malaiga pels malmaridats.

– « Fai ta mala!» es lo crit de raligament dels malmaridats viatjaires.

– La malasòrt es totjorn de retorn cò dels malmaridats.

– Se parla d’un malmaridat vièlh coma Maltusalèm.

– Al cafè, los malmaridats bevon veirats de Malibu e cantinas de Malvesia

– Es fòl lo nombre de malapreses a l’escòla dels malmaridats.

– Fises pas ta moneda a un banquièr malmaridat: es un brave malandrin, especialista de las malversacions!

– Lo malmaridat letrat legís poèmas de Malèrba : « Beutat que de la gràcia espanta la natura/ Me cal plegar a l’injúria del sòrt/ Que vos devi daissar, e luènh de vòstre pòrt/ Me’n anar al bon grat del vent seguir mon aventura » de Malarmat: «Brisa de mar: Fugir! Fugir enlà/ Sentissi que los aucèls son embriacs/ d’èsser entre escruma desconeguda e los cèls/ Lèva l’ancora per una exotica natura/ Escota los cants dels marinièrs!»

Marcèl-Idat Roch

(°) Passarem jos silenci lo conflicte actual a la direccion de l’associacion entre la tendéncia autonomista occitana que ten al sigle LPA (Liga de Proteccion dels Aucèls) e la tendéncia francofila que voldriá servar lo sigle francimand LPO en batejant l’associacion Liga de Proteccion Ornitologica.

• Complements:

1) Article: Un brave article suls pingoins dins lo n° de mai de 2025 de la revista National Geographic.

2) Film: Sortit en 2024, lo film Penguin Lessons. La vida de l’eròi càmbia quand trapa un jove pingoin sus una platja salopejada pel petròli.

3) Jornada: Lo 25 d’abril es la jornada internacionala dels pingoins per alertar sul risc de lor disparicion en rason del cambiament climatic.

4) Piscina: Unas scènas del novèl Batman necessitavan la participacion de pingoins. Los participants agèron dreit a una caravana refrigerada, una piscina a l’aiga fresca cambiada cada jorn e un agent de seguretat per velhar sus eles. Èran talament contents los pingoins que naissenças advenguèron pendent lo temps del viratge del film.