Un conte tradicional adaptat onte se trapan los «ingredients» del conte mas tanben, coma dins la faula, una moralitat!

I aviá un còp una galineta roja que cercava dins la cort de la bòria…

Trapèt un gran de blat.

«Qual vòl semenar aquel blat amb ieu? diguèt la galineta roja.

-Pas ieu,pas ieu! faguèt lo rit.

-Nimai ieu! Ajustèt lo piòt.

-E ben aquò serà ieu diguèt la galineta roja.»

E semenèt lo gran de blat. Venguèt la prima e la bona calor del solelh de junh, s’amadurèron las espigas.

«Qual vòl segar lo blat amb ieu? diguèt la galineta roja.

-Pas ieu,pas ieu! ajustèt lo piòt.

 – E ben aquò serà ieu diguèt la galineta roja.»

E seguèt lo blat, lo batèt e diguèt:

«Qual vòl portar lo blat al molin?

-Pas ieu, pas ieu! faguèt lo rit.

-Ni ieu tanpauc! Ajustèt lo piòt.

 – E ben aquò serà ieu diguèt la galineta roja.»

Quand lo blat foguèt molgut e cambiat en blanca farina, la galineta roja diguèt:

«Qual vòl pastar e far de pan?

-Pas ieu, pas ieu! faguèt lo rit.

-Ni ieu tanpauc! Ajustèt lo piòt.

 – E ben aquò serà ieu diguèt la galineta roja.»

La galineta roja faguèt lo pan, enfornèt… Quand aguèt tirat lo pan del forn, un pan daurat e crostilhós qu’embaumava , diguèt:

«Qual vòl manjar de pan?

-Ieu, ieu! Cridèt lo rit.

-Ieu, ieu! Cridèt lo piòt.

-A que nani! Non, pas vosautres. Ieu e mos poletons lo manjarem! Còt, còt, còt venètz pichons, còt, còt, còt!».E la galineta roja e sos poletons se regalèron mentre que lo rit e lo piòt partissián capbàs!

E cric e crac lo conte es acabat, E cric e crac lo pan es plan manjat!

Aquò vos agrada? Alavetz a lèu per d’autras istòrias, me damne!

Podètz escotar «Lo mescladís» sus lo site de Ràdio Lengadòc o de Ràdio Lodeva.