Non, anam pas parlar agricultura o cosina ! Las aventuras de Gran de Milh, es lo projècte pedagogic occitan 2022/2023 pels escolans de las classas primàrias dels 4 departaments occitanofòns de l’Acadèmia de Montpelhièr (Aude, Gard, Erau, Losera).

Dempuèi mai de trenta ans las classas inscrichas fan un trabalh de qualitat qu’abotís a una amassada departamentala : « las encontradas ».

E aquesta annada es Clarmont Erau qu’aculhirà mai de 2000 escolans de tot lo departament per las « encontradas » lo 15 de junh.  Fòrças escòlas de Còr d’Erau i participan : del platèl del Larzac fins a la plana d’Erau !

La conselhièra pedagogica en Occitan, Celina Serva, passa dins las escòlas per ajudar los ensenhaires dins l’organizacion, la programacion, aprene los cants, las danças als mainatges…

Lo projècte es sovent orientat sul conte. Dins « las aventuras de Gran de Milh » seràn evocats los contes de Jean de l’Ors, las fadas o los mostres coma « la Tarasca ».

Cada mainatge recep un libret contenent un album e una benda dessenhada e un CD dels cants e danças enregistrats per de professionals.

L’ensenhaire a un dorsièr pedagogic plan complèt qu’adaptarà en foncion del nivèl de lenga de sa classa (trabalh sus l’istòria del libret). Abordarà tanben nombre de nocions coma la geografia, l’istòria, l’educacion civica, los jòcs tradicionals , los jòcs de cort…

L’ensenhaire pòt consacrar 45 minutas per setmana per las lengas regionalas (cf : programas oficials de l’Educacion Nacionala).

Las classas bilinguas an mai de temps a consacrar a l’aprendissatge de la lenga (veire escòla Jean Rostand a Clarmont d’Erau).

Dins un article venent veirem d’extraches del dorsièr « Gran de Milh »

Anatz, zon, al còp que ven !

(N’avètz aquí dejós l’audio en cas que los de ràdio Lengadòc siagan a la ramassa per lo pòdcast.)