Diga ! Es caluc aqueste Macron, a virat canturla o nasquèt un jorn que la luna èra pallòta ? M’an dich, figuratz-vos, que per aqueste ivèrn demanda als franceses de se caufar a 19 grases. Aquel piòt, se l’escotam anam cramar lo doble de lenha que passam de costuma e es pas el que nos la vendrà copar !

Que, nautres sèm dau campèstre, de la ruralitat prigonda coma dison amondaut, e qu’avèm pas que lo còr de caud… Per l’ostau es quicòm mai. Question d’acostumança. Antau fasiá un còp èra la mameta de l’amic Renat que demandava a son pichòt, quand fasiá uòch grases dins la sala ont èra : « Renat, pichotet, dobrís-me la pòrta de defòra qu’estofam ». Èra contenta quand fasiá 4, e aviá pas besonh de frigo. Tant d’estauviat !

Vòls que te diga ? Se ne poiriá préner exemple tant per la freg coma per lo caud. E quand vese aqueles despiucelaires de noirigas s’espaurugar ara davant la climatizacion dels estadis dins las sablas dau Catar, ieu tanben, coma la mameta de la faula, m’estofe mas es de la colèra granda…

E tot aquò per faire córrer quatre cabras subrepagadas e descloscadas darrièr una pauma qu’es pas solament ovala, amb en mai lo desplaçament d’aqueles jogaires multimiliardaris que se va far en avion privat e individual, vos prègue. Bòta, plan aüroses aqueles qu’an pas lo lum au granièr, pagaràn pas tan car en electricitat a la fin dau mes !

Que siás tu e la planeta que regalan. E lèu los jòcs olimpics d’ivèrn dins lo desèrt d’Arabia Saudita sus de nèu artificiala…

Ara qu’avèm beguda la mar, podèm beure l’estanh de Taur, tant qu’a i èsser. Ai ja prevengut lo cosin : se las vinhas son pas climatizadas, aurà pas besonh de m’esperar per las vendémias venentas !

Enfin, per çò que ne dise, ieu.

 

 

La guinhada de l’IEO34. E, rau !

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.