VÒTS  de l’IEO 34 E..rau

Lo temps dels vòts es de costuma vodat a l’optimisme, e cadun de cercar las lunetas ròsas per se las cargar. Soi pas dins l’idèia de me’n escapar, pasmens l’anar del mond dins maites domenis nos tira pas cap a una beatituda  meravilhada. Las voses autorizadas coma se ditz ( per qual ? per qué ? ) fan encara cantar los endemans, mas pel moment ausissèm puslèu lo cruissir dels còps de rabòt e lo cliquetejar dels cisèls sus las ajudas institucionalas que nos son tant necessàrias. Vos avèm tenguts al fial de la situacion e de las dificultats qu’anam rescontrar dins nòstre prèzfach  per afortir la plaça de nòstra lenga e faire viure sa cultura.

Nos demòran nòstra volontat, la vòia  que cadun pòt i metre, lo nombre que serèm per o cridar, saique nòstra  capacitat d’organizacion, de solidaritat per una cooperacion eficaça. Vaquí los vòts que fasèm per l’annada que comença. L’IEO aviá pres coma devisa la Fe : fe dins la valor de nòstra cultura,  fe dins nòstre drech de la salvar, fe dins lo combat de menar, mas ensenhava  que la Fe sens òbras mòrta es. Maitas generacions i an obrat. Tot planhent nòstras dificultats, la reconeissença que se meritan e  l’omenatge que  lor devèm de seguir la dralha e  de perseguir l’òbra. L’IEO d’Erau i es totjorn engatjada  e vos i espèra.

Son Conselh d’Administracion desira a totes e a cadun, sòcis e amics una annada 2026 bona e plan segur acompanhada  de çò melhor qu’esperatz per vosautres  e los vòstres, capitadas, bonaurs, plasers e jòias, amb la santat  segur  per ne  gausir del tot.