Anar en bicicleta !

Vos vau pas cantar a la faiçon de l’Ives Montand !

Vau pas solament parlar de la bicicleta perque es dins l’aire del temps, enfin…  un pauc ça que la !

Perqué fasèm de  « bicicleta » ? Simpla question, mas responsas multiplas quitament complèxas !

« Es bon per la santat ! » Aquí cresi que serem d’acòrdi ! Encara cal estudiar totes los paramètres, e ne mancan pas : durada de la sortida, desnivèl, vila, rota, camins, activitat esportiva, ciclotorisme…

La condicion fisica, l’atge e la practica esportiva de cadun son a prene en compte.

En vila coma sus la rota cal  respectar  las règlas de securitat, lo còdi de la rota del ciclista e dels autres utilizators : autos, camions, carris, trotinetas electricas, mòtos, pedons…

D’amainatjaments se realizan tròp lentament vist l’aumentacion del nombre de bicicletas .

Las vias verdas son de bonas iniciativas, insufisentas mentretant. Las pistas  pels velos securizadas (separacion de la rota per un paredon de ciment) son tanben fòrça plan mas tan pauc nombrosas dins nòstre departament ! Las pistas materializadas per de pintura, lo despartiment dels corredors de busses son d’autras iniciativas (en vila) de còps perilhosas en periòde de granda circulacion. Enfin las carrièras a sens unic (sens defendut per las autos mas pas per las bicicletas) poirián èsser una solucion , mas  pòt èsser perilhosa se las autos estacionan del costat de la via ciclista, çò qu’es sovent lo cas ! D’efièch coma dire a las gents de pas estacionar davant l’ostal o  los apartaments, d’anar luènh de l’ostal, e i a sovent mai d’una auto per fogal! Vesètz es mai que complicat !

 Partejar la circulacion en vila, òc, mas cal mestre lo « paquet » dins los mejans de securitat. En bicicleta o en auto amb lo risolet, macarèl !

De qué ne pensatz ?

Al còp que ven e tenètz vos fièrs !