SVF, Sens Vila Fixa

Diga ! Me daissère dire que son a passar l’escoba dins París, París… Pensatz, cau que tot siaga a carrau, los J. O. se sarrant, lo mond tot van téner de graciosada e beure de l’uòlh la vila escanaira. Me pensave ieu qu’en seguida la grèva dels pobelaires fasiá mestièr de levar bordilhas e salopariás amolonadas sus los trepadors de la capitala de França. Que non pas ! Vergonha ! Te parlan eles de sacar defòra -en fach dins un autre defòra que pauròts defòra los son ja- los sdfs que fan pas polit polit dins lo tablèu. Son pregats de mudar los catons per daissar sos tibanèls -talament ben plaçats en riba de Seina, de canals o de periferic- a nòstres amics visitaires dau mond tot. Los estudiants parisencs pagaràn tanben los plats copats de l’eveniment e deuràn abandonar sas cambretas a l’òst dels atlètas e a las majoretas, jornalistas, publicistas e macarèls de tota mena que los acompanhan. Vergonhassa !

Vòls que te diga ? Son pas flames flames aqueles J. O.. Ja, te caliá pagar una fortuna per far passar la flama mitan las garrigas assecadas de ton departament, per aver l’astre d’alucar en çò tieu un incendi olimpic. Puòi nos faguèron lo còp de las plaças a prètz proïbitiu per èsser segur que i anèssem pas. E ara tira-te d’aquí que m’i meta. Los sdfs de París a Lion, los de Lion a Marselha, aqueles de Marselha a Tolosa, son pas pus los jòcs olimpics es lo torn de França dels SVF, dels sens vila fixa !

E se pensan aquelas colhas fascistas de netejar antau sa vilassa ? Mas tant qu’escamparàn pas a petelega ministres, deputats, senatators, nauts fonccionaris e decideires afranchimandits, borgeses aparisenquits e parigòts de nauta grana, París demorarà totjorn París. Pas mai que çò qu’es.

Enfin, es çò que ne dise, ieu !

La guinhada de l’IEO34. E, rau !