Passejadas dels Sants : cap al Larzac !

 Se trapan 77 comunas dins còr d’Erau, o avèm vist un còp èra. Mas sabètz quant i a de comunas començant per Sant ? 16 ! sus 52 que se trapan dins Erau ! Per nòstre canton aquò fa mai de 20 %  alara que la mejana francesa es d’un pauc mai de 10 !

Los noms de Sants venon de l’Atge Mejan, noms dels martirs bailats per la glèisa. Sul Larzac se trapa 4 comunas amb un « Sant ». Aquò’s una polida passejada (veitura o bicicleta?)

 En veitura prene l’A75 cap al pas de l’Escaleta. Passar lo tunèl e anar quèrre la sortida 50 cap a Sant Fèlis de Leràs, pichòt vilatge, plan conegut per lo nom del Senhor Pons de Leràs fondator de l’abadiá de Silvanès dins Avairon del temps de l’evesque Frocran de Lodeva a l’entorn del sègle XI.

Podètz anar cap al mirador per veire la val de Lèrga al pas de l’Escaleta. Sublim !

Puèi cap al Cailar e son Ròc Castèl, prene la rota per anar a Sant Miquèl d’Alajo (o de las Sèrps, nom bailat en cresença d’un nombre important de sèrps ? ).. Veire lo « castèl » de 1206 que velha sul vilatge. Prene la rota de Solatge, a la vòstra esquèrra la capèla de Sant Genès. Polit Larzac ! La rota  es estrecha, cal rotlar doçamenton, direccion lo masatge de Besses amb una vista panoramica sus la plana de Sant Maurici.

Sant Maurici-Navacèla que se sonava « Fontanilha de Virs » a la Revolucion. Prenètz la rota de la Bauma Auriòl e lo punt de vista, lo mirador de Navacèla !  Dins lo «  trauc » la clòsca d’ustra ! Païsatge meravilhós ! L’estiu de buses pichonets davalan  e …montan, aquò’s una idéia de primièra!

Retornar a Sant Maurici e per la RD 25 la longa rota dreita de la plana arriba al Mas de Bedòs. Aquí virar a dreita cap a Sant Peire de la Faja « sentinèla del platèu » amb son molin de vent !

E ara davalada cap al « país bas » !