Quicòm que vira pas redond…

​Çò que vira pas redond es plan lo balon de fòbal. Fa d’ans agèron l’idèia estranha de fisar a Quatar l’organizacion de la Copa del Monde de la pauma redonda. Anèsses pas creire que foguèt l’interès esportiu que butèt las instàncias internacionalas de la disciplina de faire aquela causida susprenenta.

Las rasons financièras dintrèron en consideracion e una votz balhada pòt esperar un retorn sus investiment. Se vesiá clar coma un fòra-jòc que los problèmas mancarián pas. La causa èra d‘una simplicitat bèla : bastir uèit estadis ont i aviá res. Un intelligent alertèt que la competicion se poiriá pas faire a las datas costumièras de junh e julh que lo solelh te vos auriá transformat los jogaires en arencadas ! Doncas, causiguèron d’organizar l’afar per decembre, mas coma la calor pren gaire de pausa dins la contrada, decidiguèron de… climatizar los estadis. Un pas de mai dins l’artificializacion del jòc e de las activitats umanas.

E los estadis, e ben !, demorava de los faire sortir de tèrra : lo país faguèt venir de man-d’òbra en nombre sens prene lo temps de legir lo còdi del trabalh e las règlas de securitat. Un esclau (nafrat o mòrt), aquò se remplaça aisidament per un autre esclau. E s’aqueles obrièrs s’empilan dins cambròts al bèl mitan de las babaròtas, quand siás president de la Federacion francesa pòdes faire part de ton compatiment en diguent qu’amb un pòt de pintura e tres còps de pincèl, tot aquò se pòt arrengar plan aisidament. 

Coma i a gaire d’ostalariás dins lo país, va èsser una senha d’avions que se van pausar e envolar de longa. L’emprenta-carbona va poder pujar tant e mai… Un còp que la competicion serà acabada, a de qué poiràn plan servir aqueles estadis bèls ? Apelats de venir las joves roinas d’una demesura financièra qu’a pas res mai a véser amb l’esperit del jòc.

E coma an ja retenguda la leiçon, vaquí qu’Asia imagina d’organizar sos Jòcs d’ivèrn en Arabia Saodita, país conegut per sos estanhs gelats e los borrilhs de nèu qu’i tomban dessús cada an qu’as pas solament besonh d’un sol de tos dets per los comptar ! Vertat qu’an l’experiéncia dels Jòcs olimpics sus nèu falsa en China !

Coma lo balon redond fa pas virar armoniosament la planeta, ieu, en tota amistat, vos balhi la solucion : gaitatz la Tèrra virar sus una orbita ovoïda. D’aquesta passa, se debanan en Anglatèrra tres Copas del monde de rugbí de 13 : la dels òmes, la de las femnas e la del 13-cadieral. E aquí i a pas agut de besonh de bastir d’estadis novèls que las pelenas de la contrada son acostumadas de veire jogaires de fòbal o de rugbí córrer a la perseguida de la pauma e de la victòria. E s’es pas aqueste còp, probable que serà pel còp que ven… L’essencial es de balhar lo melhor de se. E l’espectator verifica s’a pres pro de moneda per anar crompar una cervesassa a l’estanquet ! Còp de pè de seguir…​Ovalinet Roch