Bolega ! Monta-lo ! Vai lo quèrre ! « Quatre vint un ! Mameta caga, vai i téner lo lum ! » Aquí paraula d’enquantaire dau lòto que pòt tornar d’actualitat dins pas gaire : las copaduras d’electricitat son anonciadas per deman.

Aquela empega ! Quand faguère mos estudis d’electricitat, fa pas tant de temps qu’aquò, França èra en subreproduccion. Sabiam pas de qué ne faire dau corrent escupit per las centralas nuclearas dau De Gaulle. Mas diga ! Ont es passada la Fada Electricitat, sabètz, aquela qu’emmasquèt lo Claudi Francés que se fasiá dire Cloclò ?

O te vau dire ont es passada, o te vau dire grand fenhantàs, te vau faire lum ieu… Engolida per ta brosseta electrica per las dents, la Fada Electricitat, per la patineta que vòls pas pus butar, per ton cisèl de podar coma un sabraca 1000 pès de vinha a la jornada o per ta bicicleta sens pedalas que se recarga solament pas dins las davaladas ! Sens te parlar de ta climatizacion o de ton lava-cervèl numerizat. E ara, que n’i a pas pus, los de París volontan fòrt e mòrt que lo mond se crompèsson la veitura electrica, aquò es polit, mai fòrt qu’un Rocafòrt de farlabica !

Crese qu’an pas lo lum au granièr amondaut que, pecaire, fa un moment que s’es damorçat lo sègle dels Lumes. Pauròts, ne fan totjorn quauqu’unas que i creman, au lum. Nasquèron saique un jorn que la luna èra pallòta.

En tot cas, volètz que vos diga ? Quand Mameta n’aurà acabat de far sos afars dins la cabana dau fons de l’òrt, francament, sabe pas onte lo vau penjar lo mieu de lum.

Enfin, es çò  que ne dise ieu.

Dins l’espèra que ràdio Lengadòc trapèsse una solucion a son problèma de personal per metre a jorn los podcasts vos prepausam l’audio de la setmana. Bona escota.