Als  sòcis  e amics de l’IEO 34

BONA   ANNADA  ! ! !

                                  PLAN  GRANADA  ? ? ?

L’an s’acaba dins un trebolici politic que nos pòrta dobtes e laguis per l’anar del país. E mai per las òbras que menam  per la lenga nòstra. Se, coma se ditz, governar es preveire, lo nombre de pècas  en renguièra  pòdon pausar de questions sus la capacitat de preveire per menar lo país, e primièr de se tirar de la crisi, del pati que i sèm enfangats. Las ambicions partisanas e personalas fan que lo mal ten pas sonque los qu’an la man a l’empenta.

La primièra mesura que nos es arribada es  de nos sarrar la cinta, e de mai d’una òsca !   Lo nòstre sentit es que nos la sarran sus la garganta. Pasmens dins l’annada, l’IEO 34  a seguit d’obrar a la mission que s’es balhada : aparar e promòure la lenga e la cultura occitanas.  Ne coneissètz los biaisses : ensenhament e practica de la lenga, edicion e difusion de libres, animacion al mai pròche de las gents, ligams entre los fogals de cultura  que son los cercles e associacions membres de nòstra seccion departamentala,  e plan segur los sòcis individuals .Tot aquò realizat per de benevòls al nivèl  de l’IEO 34 tant coma a lo dels cercles, amb lo vam balhat per Domenge que se pren una part màger del prètzfach. Per totes felicitacions e mercejaments.

Pasmens nos podèm pas quitar anar. A totes  desiram una annada  bona, la capitada de vòstres projèctes e que servèssetz aquel vam que nos fa agir per la lenga e la cultura nòstras, amb totjorn lo plaser qu’i trobam

Amistats,  santat e bonaür per vosautres e los vòstres

                                                                                                        Albèrt Arnaud