Diga ! Es a res pus i compréner e pasmens semblariá qu’una pagina se virèsse. N’acabam saique d’una temporada curiosa facha de masquetas e de morres lords, d’embarraments  e d’atestacions messorguièiras, de cobrifuòcs, de sulfatatges en teletrabalh e d’amor de luònh.

Finit a de bon, o cau esperar, lo temps que te percaçavan per las garrigas nautas, tèrras de non-drech a la passejada, secutat per de drònes sus los dralhòus de Sant Guilhem. Non parlarem dels vaccins pas tant fòrts coma l’aiga bolida que nos sauvèron pas la vida de totes, dels tèsts obligatòris per aver lo passa-que-t’ai vist sanitari o dels variants avariats… Mas, i a  pas que los Innovents de Niana que cambian pas de vejaire, e ara, emai agantèsses la gastapiana chinesa variant XBB1.5 te prègue – avèm agotat l’alfabet grèc- per la secu siás pas pus malaute e as pas drech solament a un arrèst de trabalh.

Francament, nos ficar tot aquel rambalh per ne venir a aquò… Vos demande un pauc se son pas un pauc tòca-la-bomba amontdaut, quand avançan o fan d’agalís coma cranquetas sus la sable de Taur e puòi quand an fach susar tot lo mond fan repè e van de reculons.

Vòls que te diga ? I a un temps que trempa e un autre que destrempa, çò que l’un tricoteja l’autre s’afana d’o destricotar. Antau de las retiradas, de la fusion de las Regions que lo Macron vau ara trocejar e d’un fum de causas…

N’i a que me van faire lo morre, dau costat de Puèglaurenç mai que mai, mas lo pichon nom de Marianna per personificar la Republica de França me sembla passat de mòda, d’abòrd que se pòt pas pus parlar de garison e, se seguissèm la musica dau temps es Penelòpa que la cau nomenar.

Enfin, es çò que ne dise, ieu !

La guinhada de l’IEO34. E, rau !!

N’avètz aquí l’audio en cas que los de ràdio Lengadòc siagan a la ramassa per lo metre en pòdcats!