Sul mercat de Clarmont d’Erau…

Dimècres ! Jorn de mercat a Clarmont d’Erau ! Existís dempuèi al mens nòu sègles ( veire lo cartulari de Gelona de 1140) !

Sul Planòl, la plaça de la Republica davant la glèisa Sant Pau, es una molonada de colors e de produches alimentaris, vestimentaris, pichons objèctes, artisanat, flors …

Dimècres darrièr, Batiston, de Colhonàs, sabètz, aquel vilatjòt qualque part sus los contra-fòrts del Larzac, èra vengut far un torn per retrobar son amic Manjaplan.

Batiston arribat cap a 8 oras, aviá begut un cafè sus las alèas Salengro, puèi s’èra dirigit cap al mercat.

E  davant la glèisa Sant Pau, trapèt Manjaplan !

Manjaplan «  Adieu l’amic, qu’ as crompat uèi, de las granas, dels plants ?

Batiston – Res, aquela annada fau pas lo jardin !

Manjaplan – Cossí tu, fas pas lo jardin amb lo riu que passa a costat ?

Batiston – Òc, abans èra un riu bèl mas dempuèi qualques annadas lo nivèl demesís, de còps raja pas  !

Manjaplan – Mas va plòure, Lodeva es lo Pissador de Nòstre Sénher !

Batiston – A, se vòls de dichas e de provèrbis sus la metèo, se’n pòt trobar, mas i cresi pas mai !

Manjaplan – Perqué ?

Batiston- Mas tot a cambiat amb lo rescalfament climatic aquela annada se pòt pas dire : annada nevosa, annada fruchosa !!

Manjaplan – Rosada del matin, pluèja del ser ! Arc de seda del matin, pluèja sens fin . Garda l’espèr  l’amic!

Batiston – Rosada e arc en cèl ? O as vist aquò ? Aquel ivèrn, avèm pas agut d’aiga, se pòt pas mai dire : « Ivèrn cargat d’aiga, estiu plan bèl ! » Se vòls mentir, parla del temps !

Manjaplan – Bon, benlèu, mas cal anar dejunar ai  talent ieu !

Batiston – Es vertat que te sonas Manjaplan! »

Anatz, zon, al còp que ven!