La vinha « jogada » e cantada !

Anam tornar barrar aquel dorsièr « viticultura » en vos prepausant de documents.

Las istòrias, anecdòtas sus las vendémias, las divèrsas òbras de la vinha mancan pas, n’avètz agut un apercebut las setmanas precedentas.

 En çò nòstre, l’umorista Vilanòva, a sauput crear de personatges, de las istòrias de còps basadas sus de faches reals que se retròban dins sos espectacles coma la «  còrda fòla (1 e 2) »,  « las quatre sasons »…. e ont lo mond viticòla es fòrça present.

Segur doblidarem pas lo cantaire « la Sauze » e la cançon de la debuta, « lo vinhairon » : soi nascut al país del Cers e del Marin, al país ont jamai l’aiga a valgut lo vin ! »  paraulas de la sieuna cançon mas tanben Montredon, plan trist, e Martí, Patric, Mans de Breish e d’autres, an tanben cantat la vinha.

Cal  parlar de la « dança de las trelhas » : « E Ortala, passa se vòls passar, passa dejós las trelhas ! »

Manjar castanhas e beure de vin novèl èra una tradicion fòrça espandida dins  lo nòstra Lengadòc. Èra lo maridatge «  de la  plana e de la montanha » ! Un moment festiu pendent la davalada e la sason freja.

Encara qualques vilatges organizan de seradas amb de grops musicals coma « Castanha e vin novèl », per exemple !

Vos contarai pas l’istòria de la pichòta vinha que coneissètz, mas qu’aimi plan dire a cadun de mos espectacles (mainatges o adults) per doblidar pas lo  « papeta » que me faguèt descobrir e aimar la lenga occitana amb sos talents de contaire e de cantaire !

L’istòria de la vinha vos interèssa, volètz legir libres sus aquel subjècte ? Ne traparetz de segur al CIRDÒC. Consulti regularament, un libre un pauc vièlh (1979!) dins la colleccion « Coneissença d’Occitània » : « 3000 ans de viticulture en Occitanie », un roman de Léon Còrdas : « 7 pans », de libres sus 1907….  Mas i a de documents mai recents dins las  cavas cooperativas (la primièra foguèt a  Maraussan dins Erau), oficis de torisme, librariás. Enfin de libres a « devorar » en bevent un bon veire de vin , macarèl!

E zon al còp que ven !