Dins la padena traucada de la castanhada

Sautan las castanhas dins la padena traucada ! Castanhada amb vin novèl, aquò’s una brava escasença de parlar de tot e de pas res. Alara, al fial de las convèrsas, aquí unes subjèctes abordats.

• Fòbal : Lo president Macron a jogat una partida de fòbal. A pas marcat de but : cada còp, tirava tròp a dreita de la gàbia.

• Mèrle blanc : Los mèrles blancs (mas pas los negres !) escapan a las mesuras favorablas a las caças tradicionalas presas pel Ministèri de l’Environa. Dins las explicas, dison que cal que los caçaires pòsquen viure lors tradicions culturalas. Morala : quand cal tuar aucèls, cal respectar las tradicions culturalas ; quand cal salvar una lenga, i a pas de tradicion culturala que tengue !

• Anticatalanisme : Perpinhan a de mal per demorar « Perpinyà la catalana »; las plancardas en catalan desapareguèron long d’una quinzenada… Per subrepès, la Comuna bota un còp d’arrèst a la crompa d’un bastiment per La Bressòla (l’ensenhament immersiu en Catalonha-nòrd) per i organizar son licèu. S’agiriá de defendre lo patrimòni bastit. E la lenga catalana es pas un patrimòni ?

• Catalans muts : Sus pression del poder de Madrid, lo navegador GPS @here a retirat lo catalan de la tièra de las voses. Demòra encara @waze que parla catalan. Per l’occitan, avètz totjorn la solucion de demandar lo camin a quauque papet assetat sus un banc ! Levat que i a pas un papeta occitanofòne setat sus un banc a cada caireforc ! Crompatz-vos una bossòla !

• La pòrta del bus : Al darrièr viatge en autobus que faguèri, manquèrem de pas tornar de Tolosa. La pòrta arribava pas de se tampar a fèt e, doncas, l’autobus refusava de demarrar. Dins lo temps, un còp de pè o de viravitz e tot èra arrengat. Ara, lo menaire trafeguèt un manat de botons al tablèu de bòrd, telefonèt a collègas per dire qu’èra empantenat e acabèt de trapar una solucion sus Internet. Las pòrtas se tornèron dobrir per poder davalar del veïcul…

• Lo pè del cèl : Cal èsser piòt o ancian primièr ministre per sonar sa novèla organizacion politica : Lo pè del cèl (quitament, al plural : Los pès del cèl. Coma se lo cèl aviá mai d’un pè !). Aquela causida afirma clarament qu’arribarà pas jamai a sos objectius, vist que cada còp que fas un pas, lo pè de cèl, el tanben, se’n va un pauc mai luènh !

• L’isèda : Es pas per çò que son nom comença per una Z que serà lo Zorrò que salvarà lo paure monde. Es puslèu dins lo ròtle del zozò !

• Fin finala : D’aquela formula definitiva, los de du Bartàs ne fan lo tèma de lor serada d’adieu a la scèna aqueste dissabte 6 de novembre al domèni de Russòl a Lauran de Menerbés. E en fanfaras, sioplèt, per clavar las aventuras musicalas e artisticas de quinze annadas plan ricas per metre al gost del jorn lo patrimòni cantat del país, una idèia e una tòca bravament… bartassièras !

• Castanhada : La Calandreta de Carcassona organiza sa castanhada lo dissabte 13 de novembre a miègjorn dins la cort de l’escòla de Puèg-Marin.

Pelon Roch