Champanhe !

Diga ! Cranes escotaires (legeires), sètz encara aquí ? Me ne vesètz rassegurat tot plen, que me quissonère per vautres, me calcinère, me rosiguère, me mangère la sang… tot lo Sant-Clame de las fèstas. D’efièch, la traversada de calendas dona sovent d’èr a una crosièra sus lo Titanic e cada annada lo pòble d’òc, compausat per la màger part de golards e de chuca-fiòlas de nauta grana, i paga un tribut pesugàs.

S’avètz escapat a l’avet de Nadal que s’enflamba -mercé la garlanda de papet en 110 vòlts petaçada a l’escòtch, au cotèl d’ustras espintat prigond dins la pauma de la man, a l’espina de peis cunhada d’a galís dins la corniòla, a l’intoxicacion alimentària que sètz tombats -ò malastre grand- sus lo muscle poirit que se passèt l’estiu sus l’arena còsta las majoretas en biquinís en luòc de far saussòla amb los collègas dins l’estanh, es ja aquò… Vos parle pas dau caganís bandat a la clau coma trida per vendémias qu’escutlèt totes los fons de veires de la serada que vos menèt d’un an a l’autre.

Mai seriosament, vos espère en aquesta debuta d’an d’ataca e bon pè, bon uòlh. E los dos, d’uòlhs. Qu’estatisticament, la risca grandarassa dau periòd, es de se préner un tap de champanhe dins l’uòlh. Lo British Medical Jornau ne faguèt sa una, tant talament lo dangièr es esglasiant. Dison qu’un tap destapat partís a mai de 90 km/h dins Gard o Erau, a 80 dins Aude que son mai rasonables e s’enchichorlan sonque a la Blanqueta. Mas dins un cas coma dins l’autre, avètz pas solament lo temps de parpelejar qu’avètz l’uòlh emborniat. D’aquí a te faire completar ton brevet de destapaire cencha roja, rosada o blanca per una especializacion en vins petonejaires, coma una mena de pòrt d’arma, i a pas luònh.

Vòls que te diga ?  La solucion l’ai. Coma per los caçaires que se quilhan coma de chòts quand va plòure sus de trastets de paletas per faire de tirs ficants -daus lo sòl, montaretz sus lo cadieron de la tanta Nina per destapar la botelha de champanhe cap au bas. E ne ficaretz la mitat per tèrra. D’aquò rai, es pas mai que de champanhe…

Enfin, per çò que ne dise ieu…

La guinhada de l’IEO34. E, rau !