Que Dieu salve lo Rei !

Diga ! Imagina un pauc… Sèm dins la vesprada dau 12 de setembre de 1213, dau costat de Murèth. Alara que complètament plegat te’n tòrnas de vendémiar ta vinhòta de las costièiras de Garona, veses au pè dau castelet, dins un tarabast e un çaganh terribles, flotejar còsta las armas de l’ostau d’Aragon, las bandièiras dels comtes de Foish, de Cominges e evidentament aquela dau Raimon VI de Tolosa : de gula a la crotz clechada pometada e voidada d’aur. Dins una olor de vinassa, los miègjornaus ripalhan, festejan sa victòria e la desbranda dau Montfòrt.

E l’anar dau mond n’es capvirat : aragonés, occitan, catalan lengas oficialas en çò nòstre ? Paratge, Mesura, Larguesa, Convivéncia fondamentas de la societat ? La fe catara religion oficiala dau país ? E puòi ? L’edicte de Côtteret-Villers per forabandir latin e francés dels actes oficials ; l’article II de la Constitucion que ditz que l’occitan clapassièr de Figairòlas es la sola lenga oficiala dau país ; los ancians colonizats dau dedins colonizan l’endefòra ; lo mond entièr -coma l’augurava lo camiset Macarèl- parlan pas pus american mas occitan e crompan caçolet, bolhabaissa e vin dins los passatz-préner dels manja-lèus. Mas la tolerància eiretada dels davancièrs daissa una plaçoneta au patés de París dins una seriòta de 5 episòdis rodada sens budgèt per la television nacionala…

Vòls que te diga ? E ara per ara, ne seriam au coronament de Raimon LI, un rei de patin-patan pas res, dins una pantomima carnavalesca ? Un rei que fariá venir totes los caps d’estat de la tèrra, sos vassals, en avion privat per li prestar jurament, li far plèti e encerar las grolas e que per passar per « ecolo » s’anariá faire encoronar dins una caròça a la Cendroseta tirada per quatre chivals de Camarga cap au Capitòli. Ne seriam aquí ? lo bon pòble de Tolosa drech a bramar « Que Dieu salve lo Rei ! »

Vai te promenar ! M’aime mai de far petar lo Se canta amb los amics o dins un estadi de rugbí que garda-a-vos davant un drapèl per una peteta d’opereta. Vè.

Enfin, es çò que ne dise, ieu !

La guinhada de l’IEO34. E, rau !