Adieu brave mond, pica per ieu coma cada annada l’ora de far la lenga e de vos venir enfectar un pauc. Per vautres es la mala ora, aquela que vos cau faire lo chèc… e renovelar (o faire lo primièr pas) vòstra adesion, dintrar dins lo vam que nos pòrta, nos faire prodèl au travèrs las 27 associacions que federam aicí en tèrra d’Erau, e amassa faire país, faire lo país que nos agrada, que ne somiant, aquel que se i parla, escriu, canta, dança e viu en lenga nòstra.
En mai, sabètz que fonccionam coma una fusada de tres estancis, vòstra adesion a l’IEO34 vos fa sòci de l’IEO Nacionau e de l’IEO Occitania Pirenèus Mediterranèa. (Nautres demoram a la cava, es aquí que sèm plan…)
Reversam una part de vòstres escotissons a cadun dels nivèls de nòstra federacion. ( a la gròssa, 50% per l’IEO Nacionau; 1,50€ per adesion a l’IEO Regionau, çò que sòbra va a la seccion departamentala)
E, aquò son las solas ressorsas de l’IEO Nacionau, associacion panoccitana que ne sabètz totes l’importància, tot çò que representa e porgís.
Als uòlhs de l’Estat francés sèm pas grand causa, mas sens vautres sèm pas ren. Alara…
NB: Que siagan grandmercejats aqueles que prenguèron los davants e qu’an ja pagat son escotisson per l’an. Recebretz dins quauques jorns la factura e metrem los chècs a l’encaissament.
0 commentaires