Lo mes de març de 2026, i aurà d’eleccions municipalas en França. Aquelas eleccions definiràn la composicion de la majoritat de nòstras comunas, es a dire l’escalon administratiu mai pròche dels ciutadans e de lor vida vidanta. Dins un país ont los mèdias se focalizan gaireben totjorn sus la nauta politica, la politica municipala passa sovent al segond plan. En mai d’aquò, es aquí que se jòga una part essenciala de la vida democratica: dins las comunas se pren de decisions concretas, amb d’efièches dirèctes sus la vida vidanta.
Es tanben a aquel nivèl que la politica pòt encara demorar una accion reala, encarnada, pragmatica. Benlèu es una politica «pichona», mas es una politica que tòca lo monde de près, e qu’a un impacte immediat.
Per tant, coma ja o disiam en 2014 e en 2020, las eleccions municipalas venentas devon èsser un enjòc politic màger per l’occitanisme. Fasèm pas aquí la promocion d’un partit o d’un autre car l’occitanisme politic es plural e divèrs, coma o son d’alhors lo centralisme o lo jacobinisme. Aquela diversitat es una fòrça, mas pòt pas venir una escampa a l’inaction o a la dispersion.
Dins una situacion d’urgéncia coma la que la viu uèi l’occitan, nos podèm pas permetre de pèrdre de temps ni d’escasenças. Cal trabalhar per amassar las energias, per unir los esfòrces, per arribar a una preséncia mai fòrta de cònsols (= conselhièrs municipals) occitanistas dins las comunas del país. Sabèm pas quina es la formula ideala: Jornalet fasèm mai de jornalisme que de politica e avèm pas cap de vocacion de dire quina estrategia cal seguir. Benlèu, dins certans territòris, caldrà passar per de candidaturas independentas integradas dins de listas existentas. Benlèu que d’autras solucions emergiràn segon los contèxtes locals.
La tòca es pas d’aver lo mai grand nombre possible d’elegits d’un partit determinat, mas d’obténer lo nombre maximal de cònsols capables de portar una consciéncia, una volontat e de practicas favorablas a la lenga e al país.
Dins aquela perspectiva, volèm tornar remembrar çò que publicàvem fa doas setmanas a prepaus del Libre blanc de las municipalas. Aquel document es una aisina ciutadana, concebuda per permetre d’interpelar las listas e los candidats sus lors engatjaments en matèria d’occitan. Es un esplech simple, mas preciós, que pòt ajudar a metre l’occitanitat dins lo debat public local, quin que siá lo rapòrt de fòrça politic.
L’avenidor de l’occitan se jogarà tanben —e benlèu subretot— dins nòstras comunas, dins las decisions presas a qualques mètres de l’escòla, de l’ostal de la cultura o de l’ostal comunal. Las municipalas de 2026 ne seràn una escasença decisiva. A nosautres de ne far un moment politic a la nautor dels enjòcs.
0 commentaires