L’ALGORITME DESTIMBORLAT

La cronica de l’Alan Roch es sus ràdio Lengadòc, en picant sus l’imatge i tombaretz.

• Un còp passat, vos faguèrem part de l’envolada anti-catara e anti-ecologista d’un prèire un dimenge freg de febrièr sus las ondas de France-Culture. L’amic David Grosclaude redigèt un tèxte de protèsta que titolèt de la trista frasa prononciada pel legat del Papa Innocent-III a Besièrs en julh de 1209 : « Tuez-les tous ! » e difusèt son tèxte per Facebook. E ben, reçaupèt lèu-lèu la decision del rasal qu’èra interdit de publicacion e que lo tèxte èra retirat sulpic, vist que fasiá l’apologia del crimi e qu’èra una crida al murtre. L’algoritme destimborlat sap pas legir : es per una escritura simplassa qu’esvitariá los problèmas d’una compreneson qu’a pas integrada dins sa comprenèla. Fa pas la tria entre bona compreneson o compreneson a la revèrsa : tot aquò es parièr per el. Atal, en citant la frasa tarribla de 1209, vaquí las victimas que se trapan responsablas de las paraulas del buta-al-crime ! Un mot e una frasa son pas sols. Dins un escrit, lo contèxte compta, mas aquò l’algoritme se’n fot coma de son primièr corrièl.

– Question : Pensatz que l’algoritme interditz la difusion sus son rasal de las paraulas de La Marselhesa amb tota aquela sang impura que raja per las regas dels camps laurats ?

– Constatacion : Coma se pòt pas pensar a denigrar de longa los espleches de comunicacion de l’ora d’ara, se me faguèt aquesta remarca ucronica. Se Facebook aviá existit en 1209, la frasa maldita seriá estada retirada sul pic del rasal de difusion, l’òrdre seriá jamai arribat a las tropas crosadas, lo chaple de Besièrs se seriá pas tengut, Trencavèl auriá caçat los Crosats amb las ajudas del comte de Tolosa e del rei d’Aragon (qu’èran unes followers seuns) e ne seriam pas aquí dins una Occitania liura a vos contar aqueste afar d’actualitat ! Benlèu que los aujòls aurián edificat sus las alèias Riquet un monument a la glòria de Facebook per aver retirat lo prepaus criminal, salvat lo país, nòstre lengatge e Paratge !!!

• Mas ucronia es pas realitat, alara fòrça es de constatar que los algoritmes son a nos poirir la vida, a nos raubar nòstre liure arbitre, a nos menar ont vòlon dins l’embarrament de cadun/a dins sas abitudas de viure, de beure, d’aimar, de manjar, de legir, d’escotar musica, de viatjar,… ; te sufís d’èsser anat veire una entresenha sul Net, d’aver crompat quicòm en Amazonia (la virtuala-reala capitalistica entrepresa, e non pas la tèrra dels pòbles autoctònes percaçats),… per reçaupre un fum de proposicions de libres e disques del meteis sicut, de viatges al meteis endreit o mens car que tot qu’un pauc mai te pagarián per i anar, de beure champagne se sap qu’as chumat blanqueta e ne passi. Acabada la curiositat, la descobèrta ; defendut lo cambiament d’idèas…

• Las granas dels aucelets : E coma l’algoritme per èsser piòt es bravament piotàs, contunha de me mandar reclamas ornitologicas e comercialas per gàbias e granas pels aucelons per la sola rason que me teni al fial de l’actualitat de l’equipa de XIII de Carcassona : los Canaris !

Aritmic Roch