Març e abril, es lo moment dins nòstre còr d’Erau d’anar a la culhida d’espargues salvatges.

E de far una bona moleta, benlèu pel diluns de Pascas ?

Pichona istòria de la moleta als espargues, faiçon Bobí !

Lo punt scientific : O sabiatz ? Çò que culhissèm e manjam, se son los brots, las”tijas” e non pas lo fruch que ven mai tard . Es per aquò que cal plan coire los espargues.

Los daquòsses pichons de Bobí per una bona culhida :

Se ne volètz amassar una bona quantitat, cal pas demorar a la broa dels camins passadisses. Cal bartassejar! Alara equipament : vièlhs vestits (atencion als romècs, brancas o endreches o lo fuòc es passat, aquí supèr culhida assegurada !). Prene un sac o una biaça amb un  parelh de cisèls per copar los espargues, pichona ficèla per far de pichonas bòtas, mai facilas a recaptar e mai agradivas a la vista !

Cercatz l’espargue al pè de la planta mas dins los “cremats” es mai aisit se los vei mièlhs ! Mas, mèfi, seretz probable plan ennegrit !!

La recèpta de Bobí:

En arribant a l’ostal, lavar los espargues, puèi los metre dins d’aiga bolhenta qualques minutas per los atendrir.

Los sortir, los secar amb de papièr absorbent.

Copar los uòus dins un bòl, los batre per far la moleta. D’aquel temps dins una padena, far fregir los espargues copats en trocilhons de 1 a 2 cm. Getar los uòus. Amb una espatula virar e tornar la moleta mai o mens cuècha, pauc de temps se l’aimatz bavosa, salatz, pebratz e servissètz caud . Un delici ! Oblidetz pas un veire de vin roge de còr d’Erau (a beure amb moderacion !)

Se n’amassatz fòrça, los podètz tanben degustar en vinagreta en los fasent bolhir (d’ont l’interès de far de pichonas bòtas plan estacadas!), susvelhatz, per fin que sián pas tròp cuèches e bon apetís !

E al còp que ven, macarèl !