Aqueste còp i sèm ! Dempuèi lo 7 d’abriu de 2023 avèm la possibilitat e lo plaser de vistalhar la primièira seria televisuala occitana. Es sus la plataforma France.tv e son títol n’es «LA SERIA», amor que seguís las aventuras descabestradas e risolièras d’un duò de trentenaris que vòlon realizar una seria en occitan.

Pensatz, d’un còp 5 épisòdis de 40 minutas, es una ventrada coma jamai pels afogats de nòstra cultura. Aquel eveniment per l’ocitan es lo resultat dau testarditge escomunau de sos creators. Lo realizator n’es l’Amic Bedel que lo mond d’òc seguís dempuèi las regaladas audiovisualas dau Collectiu Dètz. Es tanben co-senarista amb lo Julian Campredon, e lor calguèt èsser caputs, caparuts e testardàsses per capitar. Imaginatz que lo primièr episòdi de la Seria lo filmèron en 2013. Aprèp foguèt un percors longaràs de trabucs per la produccion a la seguida de la recuolada de Arte. Daissèron pas e aprèp tant e mai de rebufadas e a la favor d’una evolucion de França 3 Occitania, a l’engatjament dau productor Anderandera, e de lo de la Region, clavèron la produccion. Lo gròs dau filmatge se faguèt fin de 2021, 7 ans aprèp la debuta. Emai dins las dificultats, lo tandèm perdèt pas son èime trufarèl. Lo resultat es una capitada intelligenta e risolièra amb pro d’autoderision.