Lagadigadèu la Tarasca !

Dins lo projècte pedagogic occitan « Las aventuras de Gran de milh» de las escòlas primàrias de l’Acadèmia de Montpelhièr (Aude, Gard, Erau, Losèra) se parla de la Tarasca. Mas sabètz çò qu’es La Tarasca ?

La legenda repren dels faches « reals » subrevenguts dins l’Antiquitat entre Arle e Avinhon suls bòrds de Ròse. Vaquí :

Una bèstia mostruosa semenava l’espant lo long del flume. Emportava e devorava las gents, capvirava los batèls ! Aquel animal mostruós es pas totjorn descrich de la meteissa faiçon.

Lo mai sovent es descricha amb 6 patas d’orses, un tòrs de buòu, una clòsca de tartuga, un cap de leon a las aurelhas de caval e a la cara de vièlh. Enfin la coa, escaumosa, s’acaba per un fisson d’escorpion !

Los racontes dison qu’es Santa Marta que l’auriá vencut o encara 16 joves, liberant atal lo país. Aquel mostre viviá sul ròc ont foguèron fondats mai tard, lo castèl e la vila de Tarascon que n’a fach son emblèma.

Ben ausit, la Tarasca foguèt associada als malaürs del país !A l’Edat Mejana los degalhs provocats pels aigats de Ròse, aquò’s, la Tarasca! Una fèsta votiva dedicada a Santa Marta espeliguèt al sègle XV. Pendent aquelas festivitats una representacion del mostre es passejada dins las carrièras. E aquò contunha al  sègle 19. E  la Tarasca es de mai en mai detalhada.

De jòcs a l’entorn de l’animal totemic se fan. E se canta : « Lagadigadèu la Tarasca, Lagadigadèu del castèu ! »

E uèi encara Tarascon festeja la Tarasca !

E oblidetz pas lo dijòus 15 de junh d’anar a Clarmont d’Erau ont 2000 mainatges de tot Erau participaràn a las « Encontradas del projècte Gran de milh » : danças, musica, cançons dins las carrièras de la ciutat de la gara fins al castèl !

Òsca !