De St Pèire de la Faja cap a St Fèlis de Lodés !

A mièja davalada de St Pèire de la Faja, sus l’esquèrra se tròba lo masatge de Parlatges ont un pelegrinatge, a la debuta de setembre vesiá arribar los mainatges « muts » o quècs de tota la region a Nòstra Dòna de Parlatges per lor far retrobar la paraula. Se disiá « Parla pas perque a vist lo lop ! ». Pareis que caliá veire lo lop en primièr, senon perdiatz la votz !

Puèi, lo vilatge de Sant Estève de Gorgàs : i a  tres «  masatges » : Sant Estève, bas e naut, Aubaigues, Gorgàs (e un quatren  sul platèl, La Ròca) e lo « circ del cap del Mond ». Es lo vilatge de vòstre cronicaire plan aimat !

Direccion Sobés , puèi  la rota de Fozièra, rota plan solombrosa que monta cap al Terondèl (embrancament sus l’esquèrra s’i volètz anar) e seguir la direccion del Priorat de Grandmont (a visitar). Contunhatz aquela polida rota fins a Sant Privat-Los Salces. Entre montanha e plana, lo decòr es supèrb. Puèi direccion La Roqueta e la D153 per rejónher St Joan de la Blaquièira país de l’oliva Lucas. Lo païsatge càmbia amb las vinhas, los olivièrs, la rufa es pas luènh tanben… Per la D144 arribaretz a Rabieux e direccion St Guiraud, brave vilatge crincat sus un sèrre. Polit còp d’uèlh ! Ara direccion St Adornin de Lucian, apelat Lucian après la Revolucion. S’arribatz  « a las aubetas », cal far lo « caminòl dels poètas » en partissent de la cava cooperativa o alara anar al «  ròc de las Verges ». Acabarem aquela passejada per Jonquièiras puèi Sant Fèlis de Lodés vilatge viticòla amb sa cooperativa e lo negociant « Jeanjean ». Esitatz pas a contactar los divèrses O.T., comunas e utilizatz los guidas « MIDI LIBRE ».

E  tenètz vos fièrs macarèl !