« A jòc ! » antau la paraula de l’engatjament au tambornet mostrant ben qu’èra pas mai dins l’esperit de sos creators qu’un jòc, rencontres mai o mens amistoses entre vilatges vesins. Mas s’anatz sus lo site de la liga de tambornet vos parlan ara d’espòrt.

Antau ne va de la petanca, onzen espòrt practicat en França que dison o dels Jòcs Olimpics qu’an de jòcs pas que lo nom. Mai qu’un cambiament de lexic, las lengas de pelhas que ne siái mancaràn pas de plànher la mudança d’una societat que se sap pas pus amusar e que fa de longa dins las competicions acarnassidas.

Emai lo lòto de las mametas ! Adieussiatz lo cambajon o lo mièg moton viu d’un còp èra que venián adobar un temps lo pan dur dau cada jorn. Ara las micoquetas ranças de la pèl-tirada e dels pòts botoxizats coma lo rebòrd d’un pissador son de professionalas de la ganha en milièrs d’èuros que los jogaires de poquèr a costat son pas mai que d’innocents ninòis de Niana. E ensajatz per veire de sortir un « bolega » galòi a l’enquantaire, lo cap de partida, qu’en mai a pas pus de saquetona mas una maquina que caga de bolas numerotadas, seriá coma de bramar « monta-lo » en finala dels Jòcs Olimpics quand n’i a un que fa au chival d’arçon o « vai lo quèrre ! » quand un atlèta t’escampa lo pes a petelega. Seriatz acalhaudats lèu fach en plaça publica !

Volètz que vos diga ? Seriái aquí a parlar e desparlar d’un quicòm que se practica pas pus ? Que non pas. Nos demòra lo jòc de la galejada : presar las replicas dels uns o dels autres, subredire dins una exageracion mesurada e chucosa, finaudèla, deslargar una tirada trufandièira o satirica, gausar una comparason gostosa…

Mas, me diretz, aquí sèm mai dins l’espòrt nacional !

 

La guinhada de l’IEO34. E, rau !

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.