Resumit : Misèria, un brave faure a recebut la visita de la mòrt. Mas fòrt dels vòts acordats pel Crist l’a enganada dos còps…

E las annadas ragèron,  rapidas perque èran comptadas.

E la Mòrt tornèt :

 « Ane aqueste còp es lo bon (perque s’engana pas la Mòrt mai de 2 còps !). Siás prèst, Misèria, aqueste còp es lo bon ! »

Misèria acabava de manjar, se levèt e diguèt :

« Voldriái plan culhir una pera per la set. Daissa-me montar dins l’arbre, ne voldràs una tanben ? aurai lèu fach !.

– Taratata, comenci de te conéisser, i vau anar ieu ! »

E  montèt dins lo perièr .

Mas quand volguèt davalar, demorèt empegat a la mèstra branca !

E plan Misèria, te pòdes vantar d’aver enganat la Mòrt tres còps, mas daissa-me davalar, daissa me davalar ai encara de trabalh !

– Demoraretz amont fins a la fin dels sègles !

– Faràs pas aquò, Misèria! Faràs pas aquò !

– E perqué? Ai lo temps, ieu !

– Escota, as ganhat un còp de mai, te prometi de te venir pas mai cercar!

– Baste, o juras ?

– Òc, o juri, jamai pus !»

Alara, Misèria, plan urós, daissèt partir la Mòrt .

E las annadas se son escorrudas, doçamanetas, doçamanetas perque  ara èran pas comptadas !

Mas Misèria trobèt lo temps long, long, long : annadas, sègles…

Pensatz, dempuèi que vei l’inconsciéncia de l’òme, las guèrras, las epidemias, las faminas, la misèria, òc la misèria dins lo mond !!

De còps, dins son ostal, ausís de bruches, dels cruissiments sus son plancat vièlh, alara se ditz : “la mòrt me ven enfin cercar!” Mas non, la mòrt fa la sorda aurelha ! Es sa venjança !

Uèi a creat de comptes sus las rets socialas, mas res i fa pas, la mòrt fa totjorn la sorda aurelha !

 E lo nom de Misèria es de mai en mai conegut pertot dins lo mond, pensatz amb las rets socialas! S’ausís sovent : “Tot seriá tan melhor, se Misèria èra pas mai d’aquel mond !”

 E òc, mas ara coneissètz lo perqué e lo cossí !

E cric e crac mon conte es acabat.

 E cric e crac Misèria es totjorn sus Tèrra e malurosament per longamai !

 

Dins l’espèra que ràdio Lengadòc trapèsse una solucion a son problèma de personal per metre a jorn los podcasts vos prepausam l’audio de la setmana aicí dejós. Bona escota.

red apple fruit on tree branch