Papieròt menerbés (del 7/12/22)

D’unis coneisson pas brica la vergonha :

– Uèlhs tampats e bocas barradas : Caduna e cadun sap dins qunas condicions se debana lo Mondial de fòbal : dins un país als dreits redusits, al prètz del patiment e de la mòrt d’obrièrs, amb unas règlas de vida d’un autre temps …

D’unes païses an decidit d’exprimir una fòrma de protestacion : idèia d’un braçat (refusada per la plan democratica FIFA), genolh pel sòl, man sus la boca, lògo sosten LGBT sul panèu de la conferéncia de premsa, quauquas paraulas dins las entrevistas, oficial-a qu’arriba vestit-da en arcolan,… E nòstres Pols, qu’arriban amb la Copa del còp passat en pòcha, de qué fan ? Eles, los representants dels Galleses romegaires ? Eles, portaires de las valors de Libertat, Egalitat, Fraternitat (amb majusculas, fa mai vertadièr), – òc, de qué fan ? Motús e boca clavada : « Venèm aicí per tustar dins una pauma redonda e pas mai ! » E imaginatz la catastròfa nacionala se Quatar finançava pas lo PSG ? Negacion de l’espòrt collectiu, negacion del respècte dels adversaris, negacion d’un espòrt per totes. Val mai pensar a sos contractes que de se dobrir a la societat. Aqueles Pols an la crèsta plan trista…

– Corsas de taure : Tres quarts dels Franceses son contra la corridà amb la mesa a mòrt del taure. A l’Amassada nacionala, es pas question de balhar rason als « terroristas verds » ! Sustot qu’es al nom de las tradicions… Quna tradicion, me diretz ? Una practica menada d’Espanha fa unes 150 ans per faire plaser a la femna de Napoleon lo pichon ! Res a véser amb la corsa camarguenca o la corsa landesa. Alara que Catalunya a interdit las corsas de taure e que las arenas sonan lo voide dins plan de vilas d’Espanha, al nom de qué e de qun rasonament bistòrt se pòt contunhar una tala practica ! Un mataire de taures ditz sus las antenas que la bèstia patís pas quand es dins l’arena ! Es temps de dire : pro ! Lo buòu (e l’ase) èran dins la grèpia de Betleèm : un simbòl de naissença e de vida a venir, plan mai gaujós que lo taure negre, negre coma la mòrt. Daissetz pàisser los taures en patz !

– Consultants : N’i aviá pas pro dels rasals a-socials, dels tripatolhatges dels espions russes, aprenem ara que d’agéncias de conselh, de consultants an despensat moneda e obrat per faire cabuçar las eleccions presidencialas del costat que lor i agradava. Aquò combinat amb l’abstencion de mai en mai massissa de ciutadans desciutadanizats nos remanda un image gaire polit de nòstra democracia.

– Divendres negre : Lo 25 de novembre, jorn de Santa-Catarina ont se ten pas mai fièra a Carcassona, èra ongan lo Divendres negre (Black Friday, en fr.). Espantant de veire cossí las causas – vestits, material, veituras, mòbles,… – pòdon costar 20 % de mens, la mitat veire lo quart del prètz de la velha. Dins lo temps s’esperava la setmana dels quatre dijòus : aquí, ai vist la setmana dels 6 divendres (l’operacion se debanèt per d’unes del 21 al 26 o del 23 al 28 !). Aquò acabat, se passarà al temps dels rebaisses. Cal èsser vertadièrament piòt-a per pagar lo prètz bèl !

VergonhetRoch