Sorrisètz, sètz filmats !

Diga ! Legiguère dins la premsa d’aquesta setmana que los japoneses corrisson coma cabras a la sal seguir corses per tornar apréner a sorrire. Cau dire que los pauròts se son desacostumats que venon sonque de tombar la masqueta a la fin de mars, una masqueta tant talament rasseguranta per eles que la sonavan « las braietas de la cara »… coma se de se passejar amb un eslip sus la figura te portava solaç. Francament.

Dison que los corses desemplenan pas e a 55€ de l’ora  me demande ieu se me vau pas reconvertir en coach-es-sorrires. Aquò rapòrta plan mai que de far lo professor d’occitan per l’IEO, vos o dise, e me caudrà pas una ora per te lor desligar los zigomatics, faire escacalassar e espetar de rire la practica. Que se l’òme es un animal que se ritz, l’òme o la femna d’aquí biscan pas. Bèl temps fa que lo chagrin faguèt sa mala d’en çò nòstre.

Lo metòde emplegat au Japon es brevetat. Aquò se passa davant un miralhet. Primièr te cau tombar la culòta -de la cara, òu !- puòi far l’uòlh redond coma una vièlha cavèca, arredonir las gautas coma l’àngel Bufarèl, regussar las bocas per mostrar uòch dents en naut -pas nòus o sèt- e s’as la mirondèla traucada o jaunejanta siás fotut.

Vòls que te diga ?  E coma per azard Bautesar, es la meteissa setmana que la justícia es autorizada a activar a distància la camera de ton telefonet. Tant qu’a èsser filmats, fasètz pas lo morre o una mina de cagaire susprés. Cau pensar pietadosament a aqueles fonccionaris de polícia que van passar tot lo sant clame de sas jornadas e de sas nuòches a espepissar en dirècte ta vida excepcionala. Mercé doncas d’i faire bona figura. Sorrisètz, sètz filmats !

Enfin, es çò que ne dise, ieu !

La guinhada de l’IEO34. E, rau !